"ეჭვი მეპარება, რომ ტელევიზიის მყიდველი გამოჩნდეს. პრინციპში, მე ასე მგონია, რომ ეს ცარიელი ხმაურია,"- ამის შესახებ საქართველოს პრემიერ-მინისტრმა ბიძინა ივანიშვილმა საინფორმაციო სააგენტო "ინფო 9"-სთვის მიცემულ ინტერვიუში ტელეკომპანია "მეცხრე არხის" დახურვის ფაქტის კომენტირებისას ისაუბრა.
ივანიშვილის თქმით, "მეცხრე არხის" შენახვა თვეში დაახლოებით ერთი მილიონი დოლარი ჯდებოდა და ამას მხოლოდ იმისთვის აკეთებდა, რომ ჟურნალისტები არ დაზარალებულიყვნენ".
"მე ჯგუფი გამოვყავი ამისთვის, ახლობელი ადამიანი, ვინც მაგ სიტუაციას გაყვება. თუ იქნა სერიოზული მყიდველი, მე რა თქმა უნდა მივესალმები და რაც არის პირობები, აუცილებლად დავიცავ. არ მინდა ცალ-ცალკე ვისაუბრო. გაირჩევა ერთად და გაირჩევა ისე, რომ თქვენ ნახავთ. არც ერთ სერიოზულ მყიდველს უარი არ ეთქმება. ძალიან კარგია თუ იქნებიან,"- განაცხადა ბიძინა ივანიშვილმა.