თამბაქოს ინდუსტრია თამბაქოს კონტროლის ღონისძიებათა შემუშავებისა და განხორციელების ხელშეწყობის მიზნით სახელმწიფო კომისიის მუშაობაში ჩართვას ითხოვს.
JTI Caucasus-ის კორპორაციულ საკითხთა და კომუნიკაციების დირექტორი ნიკოლოზ მჭედლიშვილი აცხადებს, რომ თამბაქოს ინდუსტრია მარეგულირებელი ნორმების შემუშავების პროცესიდან გამოთიშული არ უნდა იყოს.
„კომისიაში შედიან სხვადასხვა სამინისტროს წარმომადგენლები, საპატრიარქოსა და არასამთავრობო ორგანიზაციის წარმომადგენლები, თუმც სამწუხაროდ თამბაქოს ინდუსტრიის წარმომადგენლები ამ კომისიაში წარმოდგენილნი არ ვართ. დღემდე ჩვენი მთავარი მოთხოვნა არის, რომ თამბაქოს მარეგულირებელი ნორმების შემუშავების პროცესში ჩაგვრთონ, თუმც ჯერჯერობით ეს ვერ ხერხდება. თუ რატომ არ ვიცი, პროცესს ძირითადად ჯანდაცვის სამინისტრო ეწინააღმდეგება. რაც შეეხება ფინანსთა და ეკონომიკის სამინისტროებს მათთან თანამშრომლობა წარმოებს, მაგრამ ეს არ ხდება კომისიის ფარგლებში და ეს ურთიერთობები არის კომისიის გარეთ.
როდესაც აქციზის გადასახადის გაზრდაზე იყო საუბარი, ეს უწყებები ჩვენთან გარკვეულ კონსულტაციებს გადიოდნენ და ამაზე ჩვენ არანაირი ნეგატიური რეაქცია არ გვქონია, რადგანაც ვიცოდით, რომ აქციზის გადასახადი უნდა გაზრდილიყო. რაც შეეხება სხვა რეგულაციებს აქ გარკვეული პრობლემები გვაქვს, რადგანაც იმ რეგულაციების შესახებ, რომლებზეც მუშაობა ამჟამად მიმდინარეობს ჩვენთვის ცნობილი არ არის და ამას ჩვენ მესამე მხრიდან ვიგებთხოლმე. თუმც ეს არ არის საკმარისი და ჩვენ გვინდა, რომ პროცესებში ჩართული იყოს თამბაქოს ინდუსტრიაც. ის რომ რაღაც ინფორმაციებს ვიგებთ, ეს ხდება იგივე ფინანსთა და ეკონომიკის სამინისტროებიდან, რადგანაც ისინი მიიჩნევენ, რომ როცა რაღაცას ცვლიან საქმის კურსში უნდა იყოს ინდუსტრიაც"- აღნიშნა ნიკო მჭედლიშვილმა.
JTI Caucasus-ის გენერალური მენეჯერი პოლ ჰოლოვეი, რომელსაც რამდენიმე ქვეყანაში მუშაობის გამოცდილება აქვს, აცხადებს, რომ როდესაც ხელისუფლება გადაწყვეტილებას იღებს, მის შემუშავებაში იმ ბიზნესის წარმომადგენლებიც უნდა იყვნენ ჩართულნი, რომელსაც აღნიშნული რეგულაცია სამომავლოდ უშუალოდ შეეხებათ.
„ნებისმიერი გადაწყვეტილება, რომელიც ბიზნესს ეხება უნდა მოიცავდეს იმ ორგანიზაციებს, რომელსაც ეს გადაწყვეტილება ეხებათ. ჩვენ მაქსიმალურად ღია ვართ და არ ვეწინააღმდეგებით პროცესებს. დარწმუნებულნი ვართ, რომ თუ ჩართულნი ვიქნებოდით პროცესში, გაცილებით ეფექტიანი გადაწყვეტილებები იქნებოდა მიღებული" - განმარტა პოლ ჰოლოვეიმ.
JTI Caucasus-ის გენერალური მენეჯერის თქმით, მსგავსი პრობლემები ზოგიერთ ქვეყანაშიც არის, თუმც უმეტესად ცვლილებების განხორციელებაში თამბაქოს ინდუსტრიაც ჩართულია, მით უმეტეს, როდესაც საუბარია კომისიის მუშაობაში ჩართვაზე.
ჰოლოვეი დიდი ბრიტანეთის მაგალითსაც იხსენებს, სადაც მთავრობამ გადაწყვიტა, რომ ქვეყანაში სიგარეტი ერთნაირი შეფუთვით (Plain Packaging) გაყიდულიყო, თუმც მას შემდეგ რაც პროცესში თამბაქოს ინდუსტრია ჩაერთო და საკითხის უფრო სიღრმისეული განხილვა და გაანალიზება მოხდა, მთავრობამ Plain Packaging-ის ამოქმედება გადაიფიქრა.
JTI Caucasus-ის გენერალური მენეჯერი მიიჩნევს, რომ საქართველოში თამბაქოს ბაზარი საკმაოდ სტაბილურია და ქვეყანაში არალეგალური სიგარეტით ვაჭრობა ფაქტობრივად არ არის. მისივე გათვლებით, არალეგალური სიგარეტით ვაჭრობას ქვეყანაში 1 %-ზე ნაკლები უკავია.
„თუ ჩვენ ვსაუბროთ მომავალ ცვლილებებზე, უახლოეს ხანებში ველოდებით აქციზის გადასახადის გაზრდას. შესაბამისად ერთეული შეფუთვის ღირებულება გაიზრდება, რადგანაც გაიზრდება აქციზის გადასახადი"- აცხადებს პოლ ჰოლოვეი.
აღსანიშნავია, რომ სტრატეგიის შექმნის შემდეგ, მთავრობამ შესაბამისი სამოქმედო გეგმაც უნდა დადოს. სამოქმედო გეგმის შემდეგ უნდა მოხდეს კანონ-პროექტის შემუშავება, რომელიც პარლამენტში დამტკიცების შემდეგ თამბაქოს ინდუსტრიისათვის სავალდებულო გახდება.
JTI Caucasus-ში იმედი აქვთ, რომ მას შემდეგ რაც შესაბამისი კანონ-პროექტის დახვეწაში მაინც მიიღებენ მონაწილეობას, რათა ქვეყანაში ეფექტური სისტემა ჩამოყალიბდეს, რომელიც საბოლოო ჯამში ისევ სახელმწიფოს არ დააზარალებს.
„თამბაქოს ინდუსტრია შესაძლებელია კონსტრუქციულად ჩაერთოს საკანონმდებლო დებატებში და მარეგულირებლებს გაუზიაროს საკუთარ უნიკალური საერთაშორისო გამოცდილება. ჩვენ უკვე გვაქვს წარმატებული თანამშრომლობის მაგალითები, როდესაც JTI რეგულარულად თანამშრომლობს სახელმწიფო უწყებებთან უკანონო ვაჭრობის წინააღმდეგ ბრძოლაში და არასრუწლოვანთა მოწევის პრევენციის საკითხებზე. JTI მხარს უჭერს მტკიცებულებებზე დამყარებულ გადაწყვეტილებებს და შეუძლია ასეთი გადაწყვეტილებების მიწოდება მარეგულირებლებისათვის"- განმარტავს JTI Caucasus-ის კორპორაციულ საკითხთა და კომუნიკაციების დირექტორი ნიკოლოზ მჭედლიშვილი.
შეგახსენებთ, რომ JTI არის წამყვანი საერთაშორისო თამბაქოს მწარმოებლის - Japan Tobacco-ს კომპანიების ჯგუფის წევრი. კომპანია საერთაშორისო ბაზარზე წარმოადგენს მსოფლიოში ცნობილ ისეთ ბრენდებს, როგორიცაა Winston, Mevius (Mild Seven) და Camel. სხვა გლობალური ბრენდები მოიცავს Benson & Hedges, Silk Cut, Sobranie, Glamour და LD. კომპანიის სათავო ოფისი მდებარეობს ჟენევაში, შვეიცარია, ხოლო 2012 წლის 31 დეკემბრის ფისკალური წლის მონაცემებით საერთო შემოსავალმა შეადგინა 11.8 მილიარდი აშშ დოლარი. JTI ოპერირებს 120-ზე მეტ ქვეყანაში და ასაქმებს 25,000-მდე თანამშრომელს.
JTI არის წამყვანი თამბაქოს მწარმოებელი კომპანია დსთ+ რეგიონში. კავკასიაში კომპანიის სათავო ოფისი მდებარეობს თბილისში. საქართველოს ბაზარზე JTI-ის პროდუქცია წარმოდგენილია 2000 წლიდან.
