საქართველოში ამერიკის შეერთებული შტატების ელჩის რიჩარდ ნორლანდის განცხადებით, ცენტრალური საარჩევნო კომისიის ყოფილი თავმჯდომარე ზურაბ ხარატიშვილი რთულ გარემოში თავის ამოცანებს თავს ართმევდა.
ნორლანდი იმ ინფორმაციასაც გამოეხმაურა, რომლის თანახმად, საარჩევნო ადმინისტრაციის ყოფილმა ხელმძღვანელმა თანამდებობის დატოვების გადაწყვეტილებამდე კონსულტაციები ამერიკის შეერთებულ შტატებში გაიარა და აღნიშნა, რომ ხარატიშვილი აშშ-ში ნამდვილად იმყოფებოდა, თუმცა იქ საქართველოს საარჩევნო სისტემაში მიმდინარე პროცესები განიხილა.
"ცესკო-ს თავმჯდომარე ამ წლის დასაწყისში ნამდვილად იმყოფებოდა აშშ-ში და ეს იყო ჩვეულებრივი ვიზიტი, რა დროსაც განიხილებოდა საარჩევნო სისტემაში მიმდინარე პროცესები. ხარატიშვილის გადადგომის შესახებ ქართული საზოგადოებიდან შევიტყვე და მე მხოლოდ ამ ინფორმაციას ვფლობ. საქართველოს პოლიტიკური სპექტრის წარმომადგენლებმა თავად უნდა განსაჯონ და გააკეთონ კომენატრები ამ თემაზე. საერთაშორისო თანამეგობრობას გასულ წელსაც ჰქონდა თანამშრომლობა ცესკო-სთან და მის თავმჯდომარესთან და მე აღვნიშნავ, რომ თავმჯდომარე უმკლავდებოდა რთულ გარემოში თავის ამოცანებს. მნიშვნელოვანია არჩევნების სრულფასოვანი ჩატარება, რათა საზოგადოებას და მონაწილე პოლიტიკურ პარტიებს ჰქონდეთ პროცესის რწმენა. დღეს, ჯერჯერობით რასაც ვხედავ,პროცესი საკმაოდ იმედის მომცემია", - განაცხადა რიჩარდ ნორლანდმა.
შეგახსენებთ, რომ საქართველოს ცენტრალური საარჩევნო კომისიის ყოფილმა თავმჯდომარემ ზურაბ ხარატშვილმა ქვეყნის უმაღლეს საკანონმდებლო ორგანოს მისი თანამდებობიდან გადადგომის თაობაზე შესაბამისი განცხადებით 12 აგვისტოს მიმართა.
საქართველოს ცენტრალური საარჩევნო კომისიის ყოფილი თავმჯდომარე ზურაბ ხარატიშვილი ადასტურებს, რომ პოლიტიკურ მოღვაწეობას გეგმავს.
ამის შესახებ ხარატიშვილმა ტელეკომპანია "რუსთავი 2"-თან სატელეფონო საუბრისას განაცხადა, თუმცა სხვა დეტალების დაკონკრეტებისგან თავი შეიკავა.
"დღეს, ცოტა ნაადრევი გამომივა საუბარი. პოლიტიკური საქმიანობის გაგრძელებას ვაპირებ, როდის გადავწყვიტე, ამაზე ცოტა მოგვიანებით ვისაუბროთ. ვადასტურებ, რომ პოლიტიკურ საქმიანობას ვაპირებ, დეტალებზე ცოტა მოგვიანებით,"- განუცხადა "რუსთავი 2"-ს ხარატიშვილმა.
გავრცელებული ინფორმაციის თანახმად, ზურაბ ხარატიშვილი საპრეზიდენტო არჩევნებში იყრის კენჭს.