თეთრი სახლი, ირანის ახალი პრეზიდენტის ჰასან როუჰანის მიერ უფლებამოსილებების შესრულების დაწყებას განცხადებით გამოეხმაურა, რომელშიც „პარტნიორობის" მზადყოფნა და ირანის ბირთვული პროგრამის ირგვლივ საკითხების გადაწყვეტის იმედი გამოთქვა. ინფორმაციას ამის შესახებ „ბი-ბი-სი" ავრცელებს.
მაჰმუდ აჰმადინეჯადის მმართველობის ბოლოს ურთიერთობა ირანსა და ვაშინგტონს შორის საგრძნობლად გაფუჭდა. მასთან შედარებით, როუჰანს, პარლამენტში ყოველთვის შემრიგებლური პოზიცია ეკავა.
„საერთაშორისო თანამშრომლობის სფეროში ჩემი მთავრობა ეცდება გაამყაროს ურთიერთობები ირანსა და რეგიონისა და მსოფლიოს ქვეყნებთან", _ აცხადებს ახალი პრეზიდენტი.
„ვაშინგტონში კი ბოლო დღეებში გაჩნდა შეგრძნება იმისა, რომ ირანთან ურთიერთობებში შესაძლოა მრავალწლიანი ჩიხიდან გამოვიდეს", _ წერს „ბი-ბი-სი".
როუჰანმა, რომელიც წარსულში ბირთვული პროგრამის შესახებ მოლაპარაკებებზე ირანის დელეგაციას ხელმძღვანელობდა, ასევე აცხადებს, რომ ვერც ერთი ქვეყანა ვერ შეძლებს მშვიდობა ომით შეინარჩუნოს და რომ ირანი არ გახდება ომის დამწყები არც ერთ ქვეყანასთან.
მან მინისტრების პოსტებზე თავისი ზომიერებით ცნობილი ადამიანები დანიშნა. თუმცა, ირანის ახალ პრეზიდენტს ჯერ ჯერობით არც ერთი სიტყვა არ უთქვამს ირანის ბირთვულ პროგრამაზე.
თეთრი სახლის პრესმდივანმა ჯეი კარნიმ განაცხადა, რომ როუჰანის ინაუგურაცია, „საშუალებას აძლევს ირანს სწრაფი მოქმედებებით გადაწყვიტოს მსოფლიო საზოგადოების შეშფოთებები, რომლებიც ირანის ბირთვულ პროგრამასთან არის დაკავშირებული".