მუამარ კადაფის რეჟიმის განათლების მინისტრს აჰმედ იბრაგიმს მისურატის სასამართლომ სიკვდილით დასჯა მიუსაჯა. ინფორმაციას ამის შესახებ „როიტერი" ბრალდებულის ადვოკატზე დაყრდნობით ავრცელებს.
ყოფილ მინისტრს ბრალად ედებოდა ნაციონალური უსაფრთხოების ხელყოფა და ადამიანების მკვლელობა.
სასამართლოს მიერ გამოტანილი განაჩენი ლიბიის უზენაესმა სასამართლომ უნდა დაამტკიცოს.
ეს პირველი განაჩენია, რომელიც მუამარ კადაფის დროინდელი მთავრობის წევრს გამოუტანეს. ამჟამად სასამართლოს მუამარ კადაფის მთავრობის მრავალი წევრი ელის, მათ შორისაა კადაფის ვაჟი სეიფ ალ-ისლამი. მისი დაცვა ცდილობს სეიფ ალ-ისლამის სასამართლო ჰააგაში გაიმართოს, ვინაიდან შიშობს, რომ ლიბიაში მას წინასწარ ცნობილი განაჩენი ელის.
