საქართველოს საგანგებო და სრულუფლებიანმა ელჩმა ლიტვის რესპუბლიკაში, ხათუნა სალუქვაძემ რწმუნებათა სიგელები გადასცა ლიტვის პრეზიდენტს, დალია გრიბაუსკაიტეს.
პრეზიდენტის სასახლეში გამართული საზეიმო ცერემონიალის შემდგომ გამართულ შეხვედრაზე, მხარეებმა განიხილეს ორმხრივი და მრავალმხრივი ურთიერთობების ფართო სპექტრი. საუბარი შეეხო საქართველო-ევროკავშირისა და საქართველო-ნატოს შორის თანამშრომლობის მნიშვნელობას.
მხარეებმა ხაზი გაუსვეს 2013 წლის ნოემბერში დაგეგმილი ვილნიუსის "აღმოსავლეთ პარტნიორობის" სამიტის მნიშვნელობას, ასევე გამოთქვეს იმედი, რომ აღნიშნული სამიტი საქართველოსთვის კონკრეტული პოზიტიური შედეგებით დასრულდება.
ლიტვის პრეზიდენტმა კიდევ ერთხელ დააფიქსირა საქართველოს სუვერენიტეტისა და ტერიტორიული მთლიანობის, აგრეთვე ევროპულ და ევრო-ატლანტიკურ სტრუქტურებში ინტეგრაციის მხარდაჭერა და წარმატებები უსურვა ახალ ელჩს მომავალ საქმიანობაში.
საქართველოს ელჩმა გამოხატა მადლიერება ლიტვის რესპუბლიკის მხარდაჭერასთან დაკავშირებით და მადლობა გადაუხადა ლიტვურ მხარეს თბილი მიღებისათვის.