„საქართველოს მომავალი პრეზიდენტის ქალიშვილი მოსკოვში სწავლობს", _ ამ სათაურით აქვეყნებს სტატიას გაზეთი „იზვესტია" და აღნიშნავს, რომ გიორგი მარგველაშვილს უყვარს ქსოვა და კაფელის დაგება, რუსეთს კი ის „რაციონალურ ურთიერთობებს პირდება".
თავად მარგველაშვილი „იზვესტიასთან" საუბარში აცხადებს, რომ მას არ აშინებს სააკაშვილის „ნაციონალური მოძრაობის" კანდიდატთან, ასევე ისეთ ძლიერ და გავლენიან პოლიტიკოსებთან შერკინება, როგორებიც პარლამენტის ექს-სპიკერი ნინო ბურჯანაძე და საგარეო სამეთა ყოფილი მინისტრი სალომე ზურაბიშვილი არიან, ვინაიდან მის უკან ქვეყანაში ყველაზე პოპულარული პოლიტიკური ძალაა".
გაზეთი ასევე წერს, რომ მარგველაშვილი პირობას დებს, რომ საქართველოს პროდასავლურ კურსს შეინარჩუნებს და ამასთან რუსეთთან „ადრინდელი ემოციურის ნაცვლად რაციონალურ ურთიერთობებს განახორციელებს".
გაზეთი ასევე აღნიშნავს, რომ მარგველაშვილი ინგლისურთან ერთად კარგად ფლობს რუსულ ენას და მიუთითებს, რომ მარგველაშვილი საელჩოსთან არსებულ რუსულ სკოლაშიც კი სწავლობდა ერთი წლის განმავლობაში.
„ეს იყო საბჭოეთის დროს სირიაში, სადაც მისი ამა ინჟინრად მუშაობდა. მისი ერთადერთი ქალიშვილი კი პირველი ქორწინებიდან, 20 წლის ანა მოსკოვში მენეჯმენტის სპეციალობას ეუფლება", _ წერს „იზვესტია".
ამასთან, გამოცემა არც მარგველაშვილის პირად ცხოვრებას უვლის გვერდს და წერს, რომ მისი მეგობარი ქალი მხატვარი და ვიზაჟისტი მაკა ჩიჩუა „ძალიან ჭკვიანი და ლამაზი ქალია".
„პრეზიდენტობის კანდიდატის ჰობბი - ქსოვა და სარემონტო სამუშაოებია. მაგალითად მას კაფელის დაგება უყვარს", _ აღნიშნავს რუსული გამოცემა.