,,დასავლეთის ინტერესი საქართველოს მიმართ, სულ უფრო იზრდება", - განაცხადა პრემიერ-მინისტრმა ბიძინა ივანიშვილმა, რომელმაც ბათუმში მე-10 საერთაშორისო კონფერენცია სახელწოდებით ,,საქართველოს ევროპული გზა და ევროკავშირის აღმოსავლეთის ევროპული პარტნიორები ვილნიუსის აღმოსავლეთის სამიტისკენ" გახსნა.
მისივე განმარტებით, საქართველოს საგარეო პოლიტიკური კურსი უცვლელია და ის არის ევროპული.
,,ამგვარი ღონისძიება მეათედ იმართება, თუმცა ეს პირველია ახალი მთავრობის პირობებში. ჩვენ ვაგრძელებთ ამ ტრადიციას, რაც იმაზე მიუთითებს, რომ ჩვენი საგარეო პოლიტიკური კურსი უცვლელია. ჩვენ მტკიცედ გვჯერა, რომ საქართველოს დემოკრატიული განვითარების გზაზე ევროპულ და ევროატლანტიკურ ინტეგრაციას ალტერნატივა არ აქვს. ჩვენ ხალხს კარგად ესმის, რომ დასავლეთთან ინტეგრაცია ის ერთადერეთი გზაა, რომელიც დემოკრატიის ჩამოყალიბების შესაძლებლობებს მისცემს ჩვენს ქვეყანას. ეს ჩვენი ხალხის ისტორიული არჩევანია და ვერც ერთი თაობა და პოლიტიკური ძალა ვერ მიიწერს ამას განსაკუთრებულ დამსახურებად, რადგან ამ არჩევანს თავისი მრავალსაუკუნოვანი ფესვები აქვს. საქართველო, ერთ-ერთი უძველესი ევროპული ქვეყანაა თავისი კულტურითა და ღირებულებებით. ბატონებო, 2012 წლის საპარლამენტო არჩევნების შემდეგ საქართველოში პირველად შეიცვალა ხელისუფლება არჩევნების გზით და სათავეში მოვიდა ახალი ხელისუფლება, რომელსაც დასახული აქვს ჩვენი ხალხის დემოკრატიული მისწრაფების რეალური განხორციელება. ჩვენი მიზანია ხელი შევიწყოთ აქტიური ევროპული ტიპის სამოქალაქო საზოგადოების განვითარებას და ასე ავაშენოთ ნამდვილი დემოკრატია", - განაცხადა ივანიშვილმა.
