,,ჩვენ ყველა პირობას შევქმნით, რომ 2013 წლის ოქტომბრის საპრეზიდენტო არჩევნები თავისუფალ და სამართლიან გარემოში ჩატარდეს", _განაცხადა პრემიერ-მინისტრმა ბიძინა ივანიშვილმა, რომელმაც ბათუმში მიდინარე კონფერენცია გახსნა.
ივანიშვილმა იმედი გამოთქვა, რომ თუ წარმატებას მივაღწევთ რეფორმების განხორციელების გზაზე, უფრო გაიზრდება ევროკავშირის დახმარება.
,,საქართველოსთვის მეტად მნიშვნელოვანია ევროკავშირის დახმარება, რომელიც ინსტიტუციური პროგრამების განვითარებით განსაკუთრებულ დახმარებებს უწევს სახელმწიფო უწყებებს. ამ დახმარების შედეგად საგრძნობლად გაიზარდა საჯარო მოხელეთა კვალიფიკაცია. ევროპული გამოცდილების გათვალისწინებით და ევროკავშირის სტანდარტებთან დაახლოების მიზნით განხორციელდა მთელი რიგი საკანონმდებლო და საკონსტიტუციო ცვლილებები. ჩვენთვის ასევე განსაკუთრებით მნიშვნელოვანია იმ მიმართულებების განვითარება, რომელიც ხელს შეუწყობს მოსახლეობის სოციალური კეთილდღეობის მაქსიმალურად სწრაფად გაუმჯობესებას, სტაბილურობასა და მიმზიდველ ბიზნეს გარემოს. ჩვენ დიდად ვაფასებთ იმას, რომ ევროკავშირი მხარს უჭერს და ჩართულია ჩვენ ქვეყანში განხორციელებულ რეფორმებში. ჩვენ მივესალმებით პრინციპს "მეტი-მეტისთვის" და იმედს გამოვთქვამ, რომ რაც უფრო წარმატებას მივაღწევთ რეფორმების განხორციელების გზაზე, მით უფრო გაიზრდება ევროკავშირის დახმარება", - განაცხადა ივანიშვილმა.