11 ივლისს ბულგარეთის, ესტონეთის და სლოვაკეთის საგარეო საქმეთა მინისტრები საქართველოს ეწვევიან. კრისტიან ვიგენინი, ურმას პაეტი და მიროსლავ ლაიჩაკი ბათუმში შეხვედრებს გამართავენ საქართველოს საგარეო საქმეთა მინისტრთან, მაია ფანჯიკიძესთან.
შეხვედრებზე მხარეები განიხილავენ საქარველოსთან ორმხრივი და მრავალმხრივი თანამშრომლობის აქტუალურ საკითხებს; ისაუბრებენ საქართველოს ევროპულ და ევროატლანტიკურ მისწრაფებებზე და ამ კუთხით საქართველოს მიერ მიღწეულ პროგრესზე. განსაკუთრებული ყურადღება დაეთმობა საქართველო-ევროკავშირის ურთიერთობებს და შემოდგომაზე გასამართ ვილნიუსის სამიტს, როგორც შესაძლებლობას ინიციატივის შემდგომი განვითარებისა და მომავალი ნაბიჯების განსაზღვრის თვალსაზრისით.
საქართველოში ვიზიტის ფარგლებში დაგეგმილია ბულგარეთის, ესტონეთის, და სლოვაკეთის საგარეო მინისტრების შეხვედრები საქართველოს აღმასრულებელი და საკანონმდებლო ხელისუფლების უმაღლეს წარმომადგენლებთან.
ბათუმში სამი ქვეყნის საგარეო საქმეთა მინისტრები, გაფართოებისა და ევროპული სამეზობლო პოლიტიკის საკითხებში ევროკომისარ შტეფან ფულესთან ერთად მონაწილეობას მიიღებენ 11-12 ივლისს, ქ. ბათუმში დაგეგმილ X საიუბილეო საერთაშორისო კონფერენციაში - „საქართველოს ევროპული გზა: ევროკავშირის აღმოსავლეთ ევროპელი პარტნიორები - ვილნიუსის აღმოსავლეთ პარტნიორობის სამიტისკენ''.