ეკონომიკური პოლიტიკის კვლევის ცენტრი საქართველოს მთავრობას ქვეყნის ეკონომიკური განვითარების გეგმის შემუშავებისკენ მოუწოდებს, სადაც აისახება ინფორმაცია მთავრობის მიერ განსახორციელებლი მოკლევადიანი და გრძელვადიანი ეკონომიკური პოლიტიკისა და მათი განხორციელების კონკრეტული ღონისძიებების შესახებ. რაც თავის მხრივ ხელს შეუწყობს ეკონომიკის გაჯანსაღებას.
„აღნიშნული დოკუმენტი დეტალურად უნდა იქნას განხილული ბიზნეს-წრეებთან, რათა კერძო სექტორმა შეიძინოს სტაბილურობის განცდა, გრძელვადიანი ეკონომიკური გადაწყვეტილებების მისაღებად. ასეთი სამოქმედო გეგმა კვლავაც არ არსებობს და უკვე გასულ 5 თვეში ჩამოყალიბებული ეკონომიკური ტენდენციები ამის აუცილებლობას კიდევ ერთხელ ადასტურებს. ეკონომიკურ სირთულეებს დაემატა საბიუჯეტო პრობლემებიც, რაც უკავშირდება სირთულეებს დაგეგმილი საგადასახადო შემოსავლების გეგმის შესრულებაში.
როგორც 6 თვის მაჩვენებლებიდან ჩანს, სახელმწიფო ბიუჯეტს საგადასახადო შემოსავლების სახით, უკვე დააკლდა 260 მლნ ლარამდე.
აღნიშნულიდან გამომდინარე, ეკონომიკურ წრეებში სიცხადის შეტანის მიზნით, მიზანშეწონილია, საზოგადოებისათვის წარდგენილი იქნეს გეგმა,თუ როგორ გადაიფარება აღნიშნული დანაკლისი.
ეს განხორციელდება ბიუჯეტის ხარჯვითი ნაწილის შემცირების, თუ დაფინანსების სხვა წყაროების მოძიების გზით"- განმარტავენ ეკონომიკური პოლიტიკის კვლევის ცენტრში.
