იმ ბოდვას, რაც გუშინ მოვისმინეთ, მე საქმედ არ მივიღებ, უარს ვაცხადებ, იმ შენობაში (სასამართლოში) ვინმე წარმომადგენდეს, - ამის შესახებ ციხიდან გამოგზავნილ წერილში "კოალიცია ცვლილებისთვის" ერთ-ერთი ლიდერი, ელენე ხოშტარია წერს.
"როგორც ყველა სხვა შემთხვევაში, რა თქმა უნდა, არანაირი შეხება ე.წ სასამართლო პროცესთან არცერთი ფორმით არ მექნება. მე მყავს ორი არაჩვეულებრივი ადვოკატი: შოთა თუთბერიძე და ანა გახოკიძე, რომლებიც მთელი ამ ხნის განმავლობაში, ჩემ გვერდით არიან.
ადვოკატი არის, მაგრამ არ არის საქმე. იმ ბოდვას, რაც გუშინ მოვისმინეთ, მე საქმედ არ მივიღებ. მით უმეტეს, ამდენი ადამიანის დაკავებისა და ადვოკატების დატვირთულობის ფონზე, უარს ვაცხადებ, ვინმე წარმომადგენდეს იმ შენობაში (სასამართლოში). ყველა საჯარო კითხვაზე ჩემს პოზიციასშოთა და ანა გაახმოვანებენ. მადლობა მათ.
გუშინ ციხეში გამომძიებლები რომ შემოვიდნენ, ბადრაგი მოვიდა და გასვლაზე უარი ვთქვი. შემდეგ საკნის კართან მომადგნენ და გავაგდე. არ შეისმინეს, კიდევ გავაგდე. შემდეგ ზურგი შევაქციე და პუტინთან გავუშვი. ბოლომდე!". - წერს ელენე ხოშტარია.
საბოტაჟის, უცხო ქვეყნისთვის მტრულ საქმიანობაში დახმარების, საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობის დაფინანსებისა და საქართველოს კონსტიტუციური წყობილების ძალადობით შეცვლისკენ, ან სახელმწიფო ხელისუფლების დამხობისკენ მოწოდების ბრალდებით სისხლისსამართლებრივი დევნა დაიწყო მიხეილ სააკაშვილის, გიორგი ვაშაძის, ნიკა გვარამიას, ნიკა მელიას, ზურაბ ჯაფარიძის, ელენე ხოშტარიას, მამუკა ხაზარაძის და ბადრი ჯაფარიძის მიმართ. განცხადება გენერალურმა პროკურორმა, გიორგი გვარაკიძემ გააკეთა.
პროკურატურა აღკვეთის ღონისძიების სახით მამუკა ხაზარაძის და ბადრი ჯაფარიძის მიმართ გირაოს, ხოლო სხვა ბრალდებულების მიმართ, რომლებიც ისედაც საპატიმროში არიან, წინასასამართლო სხდომის თარიღის განსაზღვრას მოითხოვს.
