2013 წლის მაისში მთლიანი შიდა პროდუქტის რეალური ზრდა 0%-ით განისაზღვრა. ეკონომიკური პოლიტიკის კვლევის ცენტრის საჯარო პოლიტიკის მიმოხილვის მორიგ დოკუმენტში „ფისკალური პოლიტიკის როლი ეკონომიკურ ზრდაში (სახელმწიფო ბიუჯეტის 6 თვის შესრულების მაჩვენებლები)", აღნიშნულია, რომ 2013 წლის სტატისტიკის დინამიკა ცხადყოფს, რომ წლიური 6%-იანი ეკონომიკური ზრდის მისაღწევად, წლის დარჩენილ პერიოდში, ყოველთვიური საშუალო ეკონომიკური ზრდა 8,7%-ს უნდა გაუტოლდეს, რაც, არსებული სტატისტიკიდან გამომდინარე, არარეალურია;
სტატისტიკის ეროვნული სამსახურის ინფორმაციით, 2013 წლის პირველ ნახევარში დღგ-ს ბრუნვა, წინა წლის შესაბამის პერიოდთან შედარებით, შემცირდა 6,2%-ით. ხელისუფლების მხრიდან დამატებით ახსნას საჭიროებს დღგ-ს ასეთი კლების პირობებში, როგორ მოხერხდა თუნდაც 0 პროცენტიანი ეკონომიკური ზრდის მიღწევა;
„2013 წლის 6 თვის მონაცემებით, სავარაუდოა, რომ სახელმწიფო ბიუჯეტს გადასახადების მუხლში 265 მლნ ლარზე მეტი დააკლდა და, აღნიშნული ტენდენციის გაგრძელების პირობებში, წლის დარჩენილ პერიოდში სახელმწიფო ბიუჯეტისათვის დაკლებული თანხა კიდევ უფრო გაიზრდება; ეკონომიკური პოლიტიკის კვლევის ცენტრის ექსპერტთა რეკომენდაციაა:
შემუშავებული იქნას ქვეყნის ეკონომიკური განვითარების გეგმა მოკლევადიანი და გრძელვადიანი ეკონომიკური პოლიტიკისა და მათი განხორციელების კონკრეტული ღონისძიებების შესახებ. აღნიშნული დოკუმენტი დეტალურად უნდა იქნას განხილული ბიზნეს-წრეებთან, რათა კერძო სექტორმა შეიძინოს სტაბილურობის განცდა, გრძელვადიანი ეკონომიკური გადაწყვეტილებების მისაღებად.
ამასთან, იმ პერიოდამდე, სანამ კერძო სექტორი გახდება უფრო აქტიური, სახელმწიფომ უარი არ უნდა თქვას ეკონომიკური სტიმულირების პოლიტიკაზე, რაც გამოიხატებოდა ინფრასტრუქტურული პროექტების დაფინანსებაში და ამისათვის უნდა უზრუნველყოს მნიშვნელოვანი სახსრების გაღება"- ნათქვამია ანგარისში.
