შს მინისტრი ირაკლი ღარიბაშვილი საქართველოს პრეზიდენტის მიხეილ სააკაშვილს პასუხობს. როგორც ჟურნალისტებთან ღარიბაშვილმა განმარტა, მიხეილ სააკაშვილმა კიდევ ერთხელ მიაყენა შეურაცხყოფა ქართულ პოლიციასა და სამართალდამცავ სტრუქტურებს.
,,მინდა შევახსენო ყველას მათ შორის, ბატონ პრეზიდენტს და, ზოგადად, საზოგადოებას განვუმარტო, რომ აგვისტოს ომის, 2008 წლის შემდეგ ხუთი დეპუტატი, მათ შორის "ედიანაია რასიას" წარმომადგენლები იყვნენ საქართველოს ტერიტორიაზე შემოსული. მაქვს ლოგიკური შეკითხვა თუ გუშინ სპორტულ ღონისძიებაზე დასასწრებად ჩამოსული რუსეთის დუმის დეპუტატი უქმნის პრობლემებს საქართველოს უსაფრთხოებას ისმის კითხვა - რატომ არ უქმნიდა რუსეთის დუმის ხუთი დეპუტატი იგივე პრობლემას საქართველოს წინა ხელისუფლებას. პოლიციელებს ძალიან უცენზურო სიტყვებით, საშინლად დამამცირებლად მიმართავდნენ ახალგაზრდები. ეს იყო პირდაპირი პროვოკაცია. ისინი აგინებდნენ პოლიციელებს. ეს არის შეურაცხყოფა ჩვენი სიამაყის, ჩვენი პოლიციის, მთლიანად სამართალდამაცავი ორგანოების. ჩვენ არ დავუშვებთ და არავის ვაპატიებთ უსამართლოდ პოლიციელის შეურაცხყოფას", _განაცხადა ირაკლი ღარიბაშვილმა.
შეგახსენებთ, რომ მიხეილ სააკაშვილის განცხადებით, ,,დინამო არენას" მიმდებარე ტერიტორიაზე ახალგაზრდების მიერ გამართული აქცია 100 პროცენტით გამართლებული იყო. მისივე განმარტებით, საქართველოში ჩამოიყვანეს რუსეთის დუმის ის დეპუტატი, რომელსაც ხმა აქვს მიცემული ჩვენი ქვეყნის დანაწევრებისთვის.
მიხეილ სააკაშვილმა ასევე ირაკლი ღარიბაშვილისგან, დაკავებული ახალგაზრდების გათავისუფლება კატეგორიულად მოითხოვა. როგორც ქვეყნის პრეზიდენტმა სპეციალურ მიმართვაში განაცხადა, დასაგმობია სასაზღვრო უწყების, შინაგან საქმეთა სამინისტროს და მინისტრის საქციელი, როცა დაუშვა საქართველოს მტრის საქართველოში ჩამოსვლა, რუსეთის დუმის დეპუტატის სახით.
,,რა თქმა უნდა, ასეთი ადამიანების შემოშვება არ შეიძლება, თუკი გვაქვს ღირსება, თავმოყვარეობა და ქვეყნის სიყვარული, ამიტომ მინდა ძალიან მკაცრად დავგმო ჩვენი სასაზღვრო უწყების, შინაგან საქმეთა სამინისტროს და მინისტრის საქციელი, რომელმაც დაუშვა საქართველოს მტრის ჩამოსვლა და თავისუფლად გადაადგილება ჩვენს ტერიტორიაზე. მეორე - სტადიონთან მისული იყო ახალგაზრდების ჯგუფი, რომელიც კანონის და კონსტიტუციის დაცვით აპროტესტებდა ამ სუბიექტის საქართველოში ვიზიტს. სამართალდამცავებმა გამოიყენეს გადამეტებული ძალა და აღკვეთეს მათი კონსტიტუციური უფლება, გაემართათ მშვიდობიანი აქცია. საქმე გვქონდა პოლიციის მხრიდან პოლიტიკური შინაარსის ქმედებასთან. ვთხოვ და ვავალებ ღარიბაშვილს, რომ ეს ხალხი იყოს გაშვებული. ნუ გგონიათ, რომ ქვეყანა ჩალითაა დახურული, არსებობს რაღაც წესები, რომელიც ყველა ქვეყანამ უნდა დაიცვას", - აღნიშნა პრეზიდენტმა.
