„საქართველოს ხელისუფლების პრეტენზიები სამხრეთ ოსეთში მყოფი რუსი მესაზღვრეების მიმართ მიუღებელია", _ ეს განცხადება რუსეთის საგარეო საქმეთა მინისტრის მოადგილემ, ჟენევის მოლაპარაკებებზე რუსული დელეგაციის ხელმძღვანელმა გრიგორი კარასინმა გააკეთა მოლაპარაკებების მორიგი რაუნდის დასრულების შემდეგ გააკეთა.
მისივე თქმით, აფხაზეთისა და ე.წ. სამხრეთ ოსეთის წარმომადგენლებმა დაწვრილებითი ინფორმაცია წარმოადგინეს იმ ზომების შესახებ „რომლებიც საქართველოსთან საზღვრის კეთილმოწყობასთან არის დაკავშირებული და არავის არ შეუძლია ამ ქმედებების მართლზომიერებას შეეწინააღმდეგოს".
„ჩვენ ვისაუბრეთ იმ ბრალდებების მიუღებლობაზე, რომლებიც რუსი მესაზღვრეების მიმართ საქართველოს მხრიდან ისმის. ვინაიდან ისინი ასრულებენ იმ ფუნქციებს, რომელთა უფლება მათ აფხაზეთმა და სამხრეთ ოსეთმა ორმხრივად გაფორმებული ხელშეკრუკებებით მიანიჭა", _ აცხადებს კარასინი და აღნიშნავს, რომ მოლაპარაკებათა დროის უმეტესი ნაწილი სწორედ ამ თემას მიეძღვნა.
მისივე თქმით, აფხაზეთისა და ე.წ. სამხრეთ ოსეთის ქმედებების გაპროტესტების უფლება არავის აქვს, ვინაიდან ნებისმიერი ქვეყანა უნდა ესწრაფვოდეს კონტროლის დამყარებაზე თავის ტერიტორიაზე და თავისი მოქალაქეების უსაფრთხოების უზრუნველყოფაზე.
„მნიშვნელოვანია, გვესმოდეს, რომ ეს სახელმწიფოთაშორისი საზღვარია, რისი გაგებაც არავითარ შემთხვევაში არ სურთ ჩვენს პარტნიორებს საქართველოდან", _ აღნიშნა კარასინმა.
