საინიციტივო ჯგუფი, რომელსაც სათავეში არასამთავრობო ორგანიზაცია ,,საზოგადოებრივი ინიციატივების გაერთიანების ცენტრის'' ხელმძღვანელი ირაკლი ღლონტი უდგას, ხელისუფლებას კონკრეტულ საქმეზე სამართლიანობის აღდგენის მოთხოვნით მიმართავს.
როგორც „ჯი-ეიჩ-ენს" ირაკლი ღლონტმა განუცხადა საქმე ეხება თბილისის ეკონომიკურ ურთიერთობათა სახელმწიფო უნივერსიტეტის აღდგენას.
„ათასობით ადამიანი, რომელთათვის არა თუ ეს უნივერსიტეტი, არამედ განათლების სფერო არის მნიშვნელოვანი მივმართავთ ხელისუფლებას გადადგას კონკრეტული ნაბიჯები სფეროში სამართლიანობის აღდგენის მიზნით და 2010 წლამდე არსებული სტატუსი დაუბრუნოს თბილისის ეკონომიკურ ურთიერთობათა სახელმწიფო უნივერსიტეტს. ,,საზოგადოებრივი ინიციატივების გაერთიანების ცენტრი'' ხელისუფლებას სთავაზობს ინიციატივას, რომ აღდგენილ იქნას ამ უმაღლესი სასწავლო დაწესებულების სტატუსი, ვიდრე ეს შესაძლებელია", - განუცხადა „ჯი-ეიჩ-ენს" ირაკლი ღლონტმა.
მისვე თქმით, უნივერსიტეტის გაუქმების რეალური მიზეზი მის არაპოლიტიზირებულობა იყო, რაც რეალურად არ ჯდებოდა გარკვეული პოლიტიკურ ინტერესებში.
„თეუსუ არასდროს არ ყოფილა პოლიტიზირებული სასწავლებელი და უფრო მეტიც, მას არასდროს არ მიუღია მონაწილეობა იმ საქმიანობაში (სამეცნიერო თუ სხვა მიმართულებით), რომელიც გახლდათ მაშინდელი სამთავრობო პოლიტიკა და მოკლებული იყო საზოგადოებრივ ინტერესებს, ადამიანის უფლებებისა და თავისუფლებების დაცვას. თეუსუს მეცნიერები არასდროს არ ერიდებოდნენ ხელისუფლების ლეგიტიმურ კრიტიკას ეს იქნებოდა მედიით თუ სხვა ფორმით. თეუსუს არც ერთი სტუდენტი (არც ,,სტუდენტური თვითმმართველობა'') არ გახლდათ იმ პოლიტიკის მატარებელი, რომელსაც სხვა უმრავლეს სასწავლებლებს კარნახობდა სხვადასხვა პოლიტიზირებული ,,ახალგაზრდული ორგანიზაციები'' და ამის გარანტი გახლდათ თეუსუს აწ გარდაცვლილი რექტორი, პროფესორი ბატონი გურამ თავართქილაძე, რომლის უდიდესი შრომითა და სწორი მენეჯმენტის წყალობით თეუსუს ყოველ დღე იზრდებოდა და იზრდებოდა მისდამი არსებული საზოგადოების ნდობა", - განაცხადა ირაკლი ღლონტმა.
მანვე განმარტა, რომ საფუძველს იყო მოკლებული განათლების მინისტრის ბატონი შაშკინის განცხადება, რომლის მიხედვითაც თეუსუს რეორგანიზაციის მიზეზი სასწავლებელში არსებული ,,მწვავე ფინანსური კრიზისი'' იყო.
„შაშკინის განმარტება ცალსახად მოკლებულია იყო ყოველგვარ ლოგიკას, იმ უბრალო მიზეზიდან გამომდინარე, რომ თეუსუს ბიუჯეტში წლის ბოლოს (როცა პრემიებიც კი იქნა გაცემული) დარჩენილი ქონდა 1,5 მლნ ლარი", - განაცხადა ღლონტმა.
შეგახსენებთ, რომ საქართველოს მთავრობის 2010 წლის 15 ნოემბერის გადაწყვეტილებას თბილისის ეკონომიკურ ურთიერთობათა სახელმწიფო უნივერსიტეტის ლიკვიდაცია მოყვა. განათლების სფეროს წარმომადგენლები და სტუდენტები ამ გადაწყვეტილებას იმთავითვე ნაციონალური ხელისუფლების პოლიტიკურ დაკვეთად აფასებდნენ.
