მსოფლიო ბანკის ჯგუფის წევრი საერთაშორისო საფინანსო კორპორაცია IFC, ქართული საბანკო სექტორის წარმომადგენლებს ტრენინგს უტარებს რისკების მართვასა და საკრედიტო პორტფელის გაუმჯობესების თემაზე, რაც მათ ფინანსური კრიზისის შედეგების შესუსტებასა და არასაფინანსო სექტორისთვის სესხების გაზრდაში დაეხმარება.
Eრნსტ&Yოუნგ-თან და საქართველოს ეროვნულ ბანკთან თანამშრომლობით, IFC-მ დღეს თბილისში ერთდღიანი სემინარი გამართა, რომელსაც 14 ბანკის მენეჯმენტის წარმომადგენლები დაესწრნენ. აღნიშნული სემინარი IFჩ-ის კრიზისის დაძლევის ინიციატივის ნაწილია, რომლის მთავარი ამოცანა ადგილობრივი ბანკებისა და კომპანიების გაძლიერებაა, მათთვის ფინანსური კრიზისის შედეგების დაძლევის პროცესში დახმარების მიზნით.
საქართველოს ბანკების ასოციაციის პრეზიდენტის ზურაბ გვასალიას განცხადებით, "IFC-ის ექსპერტებმა დღეს სასარგებლო სემინარი ჩაატარეს რისკის მართვისა და პრობლემური აქტივების საკითხებთან დაკავშირებული საუკეთესო საერთაშორისო პრაქტიკის შესახებ. რაც უფრო მალე მოახერხებს საქართველოს საბანკო სექტორი პრობლემური სესხების საკითხის ბოლომდე მოგვარებას, მით მალე შევძლებთ განვითარების ახალ ეტაპზე გადასვლას".
ტრენინგზე ყურადღება გამახვილდა პრობლემური აქტივების გადაცემაზე, რათა მოხდეს ახალი სესხების გაცემის სტიმულირება, აგრეთვე შეეხნენ პორტფელის მართვის თემასაც.
"დღეს საბანკო სექტორისათვის მთავარ საკითხს პრობლემური აქტივების მართვა წარმოადგენს. IFC ეხმარება ქართულ ბანკებს პრობლემური სესხების სფეროში არსებული საუკეთესო საერთაშორისო პრაქტიკის დანერგვაში. ამ მეთოდების დანერგვა შემდგომში შესაძლებელია ევროპისა და ცენტრალური აზიის რეგიონის სხვა ქვეყნებში, რომლებშიც კრიზისის დაძლევის გზებს ეძებენ," განაცხადა IFC-ის საფინანსო ბაზრის კრიზისის დაძლევის პროექტის მენეჯერმა გართ ბედფორდმა.
IFC-ის საფინანსო ბაზრის კრიზისის დაძლევის პროექტმა მუშაობა 2009 წლის აგვისტოში დაიწყო. მის მიზანს რეგიონში საფინანსო ინსტიტუტებისათვის კრიზისის დაძლევის სფეროში დახმარება წარმოადგენს. პროექტის ფარგლებში უკვე 10 სემინარი ჩატარდა 360 მონაწილისთვის, რაც ბანკებს პრობლემური სესხების საკითხის გადაწყვეტის სტრატეგიის შემუშავებაში და ამ გზით ახალი დაკრედიტების სტიმულირებაში ეხმარება. IFC-ის ექსპერტებმა საკრედიტო რისკების შეფასებასა და განსაზღვრაში კონსულტაცია გაუწიეს შვიდ ბანკს, სადაც ჩაატარეს სიღრმისეული დიაგნოსტიკა და დახმარება გაუწიეს მათ რეკომენდაციების შესრულების პროცესში.
IFC ერთადერთი საერთაშორისო საფინანსო ინსტიტუტია, რომელიც ფოკუსირებულია ექსკლუზიურად კერძო სექტორზე, რაც ახალი ბაზრების მდგრადი განვითარების მამოძრავებელი ძალაა. რეკონსტრუქციისა და განვითარების საერთაშორისო ბანკთან ერთად IFC ამჟამად ცდილობს გაზარდოს კაპიტალი, რათა კიდევ უფრო განამტკიცოს განვითარებად ქვეყნებში ღარიბი მოსახლეობის დახმარების შესაძლებლობები - მათ შორის, პრობლემური აქტივების პრობლემის მოგვარების გზით.
საერთაშორისო საფინანსო კორპორაცია (IFC) მსოფლიო ბანკის ჯგუფის წევრია, რომელიც ეხმარება ხალხს სიღარიბის დაძლევასა და ცხოვრების პირობების გაუმჯობესებაში. ჩვენ ხელს ვუწყობთ განვითარებად ქვეყნებში მდგრად ეკონომიკურ ზრდას კერძო სექტორის განვითარების მხარდაჭერის გზით, ასევე კერძო კაპიტალის მობილიზებით, ბიზნესისა და ქვეყნების მთავრობებისთვის საკონსულტაციო და რისკის შემცირებასთან დაკავშირებული პროგრამებით. 2009 ფისკალურ წელს ჩვენს მიერ მსოფლიოში განხორციელებულმა ინვესტიციამ 14,5 მილიარდი აშშ დოლარი შეადგინა, რითაც ფინანსური კრიზისის პირობებში განვითარებად ქვეყნებში კაპიტალის შედინებას შევუწყვეთ ხელი. დამატებითი ინფორმაციის მიღება შესაძლებელია ვებგვერდზე: www.ifc.org