ბარაკ ობამასა და დალაი ლამას შეხვედრამ შესაძლოა აშშ-სა და ჩინეთის ურთიერთობა დაძაბოს. ამის შესახებ ბრიტანული "გარდიანი" იუწყება.
გამოცემაში ნათქვამია, რომ აშშ-ს პრეზიდენტმა, ტიბეტის სულიერ ლიდერს კულტურულ, სოციალურ და სასულიერო მიმართულებებით ძლიერი მხარდაჭერა აღუთქვა.
შეხვედრის დასრულების შემდეგ დალაი ლამა კმაყოფილი იყო და ობამას დიდსულოვნებაზე საუბრობდა. ტიბეტელებმა კი დალაი ლამას აშშ-ში ვიზიტი ფოიერვერკებით აღნიშნეს, წერს გამოცემა.
მიუხედავად იმისა, რომ თეთრი სახლის პრეს-სპიკერი, რობერტ გიბსი ჟურნალისტებს არწმუნებდა, რომ დალი ლამას ვიზიტის შესახებ ჩინეთი საქმის კურსში იყო და ამ მოვლენას არავითარი ექსცესები არ მოჰყვებოდა, ჩინეთის საგარეო საქმეთა სამინისტრომ საკმაოდ მკაცრი განცხადება გაავრცელა. განცხადებაში ნათქვამია, რომ აშშ-მ უხეშად დაარღვია საერთაშორისო ურთიერთობების მის მიერვე კულტივირებული ნორმები.
"ვაშინგტონმა უნდა შეწყვიტოს ჩინეთის საშინაო საქმეებში უხეში ჩარევა, დალაი ლამას ვიზიტით ჩინელი ხალხი შეურაცყოფილი და აღშფოთებულია. აშშ-ს საქციელი აუცილებლად იქონიებს გავლენას ჩინურ - ამერიკულ ურთიერთობებზე", - ნათქვამია ჩინეთის საგარეო საქმეთა სამინისტროს განცხადებაში.
მიუხედავად იმისა, რომ თეთრი სახლის ადმინისტრაცია ყველანაირად ცდილობდა ვიზიტისთვის ოფიციალური სახე არ მიეცა, (შეხვედრა პრესისათვის დახურული იყო) დალაი ლამას ვაშინგტონში ჩასვლამ ჩინეთის გაღიზიანება, მაინც გამოიწვია.
ექსპერტების აზრით, შესაძლოა ჩინეთის პრეზიდენტმა აშშ-ში ვიზიტი გადადოს, რომელიც ამა წლის აპრილშია დაგეგმილი.
ზოგიერთი პოლიტიკური მიმომხილველის აზრით აშშ-ს ქმედება ჩინეთის მისამართით გაფრთხილებას ჰგავდა - თუ ჩინეთი ირანთან მიმართებაში აშშ-ს მხარს არ დაუჭერს, თეთრი სახლი მის ტერიტორიაზე სეპარატიზმის განვითარებას შეუწყობს ხელს.
