გაზიციფირებულ ქსელზე ახალი მომხმარებლის მიერთების ხარჯები 600 ლარს არ უნდა აღემატებოდეს, - აცხადებენ საქართველოს ენერგეტიკისა და წყალმომარაგების მარეგულირებელ ეროვნულ კომისიში (სემეკი).
კომისიამ მიმდინარე წლის დასაწყისიდან განიხილა რამდენიმე დავა, რომელიც ბუნებრივი გაზის სექტორში ახალი მომხმარებლების ქსელზე მიერთებას ეხება. როგორც მომხმარებელთა საჩივრებიდან ირკვევა, კომპანიის წარმომადგენლები მოქალაქეებს გაზიფიცირებულ ქსელზე მიერთებისათვის გაზრდილ ხარჯებს უანგარიშებენ და სთხოვენ, რომ მოქალაქემ უზრუნველყოს მიერთებისათვის საჭირო დოკუმენტაციის შეგროვება, რაც თავის მხრივ დამატებით ხარჯებთანაა დაკავშირებული. კომისიაში განმარტავენ, რომ აღნიშნული ქმედება სრულად ეწინააღმდეგება კომისიის მიერ მიღებულ შესაბამის დადგენილებას. ( 2012 წლის #5 დადგენილება. www.gnerc.org).
ბუნებრივი გაზის მიწოდებისა და მოხმარების წესებში #5-ე დადგენილებით შესული ცვლილებების მიხედვით, გამანაწილებელმა კომპანიამ ახალი მომხმარებლის გაზიფიცირებულ ქსელზე მიერთება, მათ შორის ტექნიკური პირობის მომზადება და ბუნებრივი გაზით მომარაგება, უნდა განახორციელოს, მოქალაქის შესაბამისი განაცხადის მიღებიდან არაუმეტეს 30 კალენდარული დღის ვადაში.
"კომპანია ვალდებულია უზრუნველყოს ახალი საყოფაცხოვრებო მომხმარებლის გაზიფიცირებულ ქსელზე მიერთებისათვის საჭირო ყველა სამუშაო და ხარჯი, მათ შორის ბუნებრივი გაზის აღრიცხვის კვანძისა და ახალი საყოფაცხოვრებო მომხმარებლის ფართზე ბუნებრივი გაზის მიღების ერთი წერტილის მოწყობა იქ, სადაც მიუთითებს მოქალაქე.
ასევე, კომპანია ვალდებულია ახალი საყოფაცხოვრებო მომხმარებლის მოთხოვნის შემთხვევაში, მას დაუყოვნებლივ წარუდგინოს გაზიფიცირებულ ქსელზე მიერთების ხარჯთაღრიცხვა.
მას შემდეგ, რაც მოხდება ქსელზე მიერთება, მოქალაქე მიერთების საფასურს (დღგ-ს ჩათვლით) გადაიხდის არაუმეტეს 600 ლარისა ერთჯერადად ან 25 ლარს ყოველთვიურად 24 თვის განმავლობაში. ასევე, თუ მოქალაქე თვლის, რომ ხარჯი 600 ლარზე ნაკლებია, მას შეუძლია მომსახურება დაფაროს ფაქტობრივი ხარჯთაღრიცხვის მიხედვით", - აცხადებს სემეკის თავმჯდომარე, გურამ ჩალაგაშვილი.
თუ მოქალაქე თვლის, რომ ენერგეტიკისა და წყალმომარაგების სექტორებში ირღვევა მისი უფლებები, უნდა მიმართოს სემეკს ან მასთან არსებულ მომხმარებელთა უფლებების საზოგადოებრივი დამცველის სამსახურს. ტელ: (0431) 25-61-20/22/23 mail@gnerc.org; mail@pdci.ge
