,,საქართველოს პოლიციაში საგანგებო მდგომარეობა უნდა გამოცხადდეს", -განაცხადა მიხეილ სააკაშვილმა სოფელ ჯანდარაში სტუმრობისას სადაც რამდენიმე დღის წინ დაყაჩაღებული ოჯახი მოინახულა და დახმარებას დაჰპირდა. პრეზიდენტმა კიდევ ერთხელ დააფიქსირა, რომ არსებული ფორმით ამნისტია მიუღებელია, რადგან ის საფრთხეს უქმნის საქართველოს მოსახლეობას.
"1992 წელს ჯაბას ამნისტიის შედეგად გამოშვებული ხალხი სწორედ ასე შემოგვივარდნენ და ბაბუაჩემს, სწორედ ასე ჩაარტყეს ავტომატი. ბებიაჩემი არ დააუთოვეს, მაგრამ ემუქრებოდნენ დაუთოვებით და ზუსტად ასევე წაიღეს ყველაფერი _ ფული და ოქროული", - განაცხადა პრეზიდენტმა.
"ახლა ეს ბანდიტები გამოვლენ. ბევრი მათგანი ციხეში შევიდა "ჟიგულებიან" საქართველოში და გამოდის "მერსედესებიან" საქართველოში, სადაც ხალხმა დააგროვა დოვლათი, სადაც ეკონომიკა 4-ჯერ გაიზარდა. მარტო კი არ ქურდობენ, მოდიან და ადამიანს თითს ჭრიან, აუთოებენ. თუმცა, მთავარია კლიმატის გავლენა - როცა მოგვიწოდებენ, გაგებით შევხვდეთ, საზოგადოება ვერ შეხვდება გაგებით იმას, რომ წლების ნაგროვებს ნაძირალა, მუქთახორა ყაჩაღი წაართმევს და წაიღებს. ვერ შეხვდები გაგებით იმას, რომ შვილს დაგისახიჩრებენ და მოგიკლავენ. პოლიციას ტელევიზორში ყელყელაობა კი არ სჭირდება, ყოველ კუთხეში უნდა იყოს პატრული", _განაცხადა მიხეილ სააკაშვილმა.
შეგახსენებთ, რომ ცეცხლსასროლი და ცივი იარაღებით შეიარაღებული ხუთ პირი მამედოვების ოჯახს ორი დღის წინა თავს დაესხნენ. ნიღბიანმა თავდამსხმელებმა ოჯახის ყველა წევრი წებოვანი ლენტით შეკრეს და პირი აუკრეს, 19 წლის ბაბექ მამედოვს კი, თითის მოჭრითაც დაემუქრნენ.
ბოროტმოქმედებმა მამედოვების ოჯახიდან 16 ათას ლარამდე ფულადი თანხა და დიდი რაოდენობით ოქროს სამკაული წაიღეს. სამართალდამცავებმა ყაჩაღური დაჯგუფების ხუთივე წევრი მომხდარი ფაქტიდან რამდენიმე საათში დააკავეს.
მომხდარ ფაქტზე დაწყებულია გამოძიება საქართველოს სისხლის სამართლის კოდექსის 179-ე მუხლის მე-2 ნაწილის "ბ" პუნქტით, რაც 6-დან 9 წლამდე თავისუფლების აღკვეთას ითვალისწინებს და ამავე მუხლის მე-3 ნაწილის "ბ" პუნქტით, რომლის თანახმადაც დამნაშავეებს 8-დან 12წლამდე პატიმრობა ემუქრებათ.