სოფელ ერგნეთში ინციდენტების პრევენციისა და მათზე რეაგირების სამუშაო ჯგუფის შეხვედრა მშვიდ და კონსტრუქციულ ატმოსფეროში წარიმართა. აცხადებს სააგენტო "ჯი-ეიჩ-ენთან" საუბარში შს სამინისტროს ანალიტიკური დეპარტამენტის დირექტორი დავით სუჯაშვილი.
"შეხვედრაზე, რამდენიმე მნიშვნელოვანი საკითხი იქნა განხილული და ზოგადად შეხვედრა, მშვიდ და კონსტრუქციულ ატმოსფეროში წარიმართა", _ აცხადებს სუჯაშვილი და აღნიშნავს, რომ ქარღულმა მხარემ ამ შეხვედრაზე 2 დეკემბერს ქარელის რაიონის სოფელ კოდასთან მომხდარი ინციდენტის საკითხი დააყენა.
" ქართულმა მხარემ 2 დეკემბერს, ქარელის რაიონის სოფ. კოდას ტერიტორიაზე მომხდარი ინციდენტის საკითხი დააყენა, როდესაც რუსულ სამხედრო ფორმაში ჩაცმულმა უცნობმა შეიარაღებულმა პირებმა ადგილობრივი მკვიდრის მიკრო-ავტობუსს ცეცხლი გაუხსნეს. შეხვედრაზე ჩვენ წარვადგინეთ ინციდენტის ამსახველი ფოტო და ვიდეო მასალა და გადავეცით ყველა მონაწილე მხარეს შემდგომი გამოძიებისთვის", _ აცხადებს "ჯი-ეიჩ-ენთან" შს სამინისტროს ანალიტიკური დეპარტამენტის დირექტორი.
მისივე თქმით, ქართულმა მხარემ ამ შეხვედრაზე არც სოფ. ზემო ნიქოზის ტერიტორიიდან გატაცებული ბეტონმზიდის საკითხი დატოვა უყურადღებოდ.
"შეხვედრაზე ასევე დავაყენეთ 28 სექტემბერს გორის რაიონის სოფ. ზემო ნიქოზის ტერიტორიიდან გატაცებული ბეტონმზიდის საკითხი. ამასთან მიმართებაში, ოსურმა მხარემ განაცხადა, რომ გატაცებული ბეტონმზიდი ნაპოვნია და ტექნიკური დეტალების დარეგულირების შემდეგ იგი ქართულ მხარეს უპრობლემოდ გადმოეცემა", _ აცხადებს სუჯაშვილი და აღნიშნავს, რომ რაც შეეხება ახალ შეთანხმებებს, ამ ტიპის თემები აღნიშნულ შეთანხმებაზე განხილული არ ყოფილა.
მომავალი შეხვედრა 2013 წლის 29 იანვარს გაიმართება.
