"მთავრობისთვის პრიორიტეტულია საქართველოს ევროკავშირში სრულფასოვანი ინტეგრაცია", აღნიშნულის შესახებ ჟურნალისტებთან ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა განაცხადა და აღნიშნა, რომ ევროკავშირთან კოორდინაციის სამთავრობო კომისიის სხდომა ახალი შემადგენლობით პირველად იმართება.
„ბუნებრივია, საქართველოს ხელისუფლებისთვის ერთ-ერთი მნიშვნელოვანი პრიორიტეტი ევროკავშირთან სრულფასოვანი ინტეგრაციაა და ამ თვალსაზრისით ასოცირების შეთანხმების ყოვლისმომცველი და ღრმა თავისუფალი სავაჭრო შეთანხმების მოლაპარაკების წარმოება და წარმატებით დასრულება მთავრობის ერთ-ერთი პრიორიტეტია", - განაცხადა პეტრიაშვილმა და აღნიშნა, რომ კომისიის სხდომაზე, მთავრობის წევრები თავის გეგმებს წარმოადგენენ საქართველოს ევროკავშირში ინტეგრაციასთან დაკავშირებით.
შეგახსენებთ, რომ მთავრობის კანცელარიაში პრემიერ-მინისტრის ბიძინა ივანიშვილის ხელმძღვანელობით საქართველოს ევროკავშირთან კოორდინაციის სამთავრობო კომისიის 43-ე სხდომა მიმდინარეობს.
