რუსეთის ფედერაციის საგამოძიებო კომიტეტი აპირებს მიმართოს დახმარების თხოვნით საქართველოს რუსეთში მასობრივი არეულობების ორგანიზების საკითხთან დაკავშირებით, რომელსაც საგამოძიებო კომიტეტის ინფორმაციით, შესაძლოა ქართველი პოლიტიკოსი გივი თარგამაძე აფინანსებდა.
განცხადება ამის შესახებ დღეს რუსეთის ფედერაციის საგამოძიებო კომიტეტის წარმომადგენელმა ვლადიმერ მარკინმა გააკეთა.
მანვე განაცხადა, რომ გამოძიებას ხელთ აქვს ისეთი მონაცემები, რომელიც არა მხოლოდ ადასტურებენ იმას, რომ თარგამაზე რუსეთის ოპოზიციას აფინანსებდა, არამედ მას არეულობების მოწყობაში კონკრეტული როლი ჰქონდა.
"ამასთან დაკავშირებით საგამოძიებო კომიტეტის მიერ უკვე გამზადებულია მოთხოვნა სამართლებრივი დახმარების შესახებ, რომელიც რუსეთის ფედერაციის გენერალური პროკურატურიდან საქართველოს კომპეტენტურ ორგამოებში გადაიგზავნება",_ განაცხადა მარკინმა.
შეგახსენებთ, რომ ვლადიმერ მარკინმა გუშინ განაცხადა, რომ მასობრივი არეულობების მოწყობის საქმის გამოძიების ფარგლებში რუსეთის ფედერაციის საგამოძიებო კომიტეტმა რიგი მნიშვნელოვანი ფაქტი დაადგინა. "წინასწარი გამოძიებით შეგროვებულია მასალები, რომლებიც ადასტურებენ, რომ ქართველი პოლიტიკოსი გივი თარგამაძე "მემარცხენე ფრონტის" ლიდერის სერგეი უდალცოვის, მისი თანაშემწის ლეონიდ რაზვოჟაევის და ასევე დეპუტატ კონსტანტინე ლებედევის თანაშემწის მართლსაწინააღმდეგო ქმედებებს აფინანსებდა, რომლებიც რუსეთის ფედერაციაში მასობრივი არეულობების ორგანიზებას ეხებოდა", _ განაცხადა მარკინმა. მისივე თქმით, ასევე დადგენილია, რომ 2012 წლის გაზაფხულზე რუსეთის სხვა და სხვა რეგიონიდან ლიტვაში რუსეთის მოქალაქეების გაგზავნა წარმოებდა, იმისათვის რათა მათ მონაწილეობა მიეღოთ სემინარში, რომელიც "ფერადოვანი რევოლუციების" მაგალითზე ხელისუფლების ხელშიც ჩაგდებას ისახავდა მიზნად.
