შვეიცარიის კონფედერაციის საგარეო საქმეთა სამინისტროს სახელმწიფო მდივნის, ივ როსიეს საქართველოში ვიზიტის ფარგლებში, გაიმართა ორმხრივი პოლიტიკური კონსულტაციები საქართველოსა და შვეიცარიის კონფედერაციის საგარეო საქმეთა სამინისტროებს შორის მინისტრის მოადგილეების დონეზე.
ქართული მხრიდან კონსულტაციებს ხელმძღვანელობდა საქართველოს საგარეო საქმეთა მინისტრის პირველი მოადგილე დავით ზალკალიანი. ასევე შედგა სახელმწიფო მდივნის გაცნობითი ხასიათის შეხვედრა საქართველოს საგარეო საქმეთა მინისტრთან მაია ფანჯიკიძესთან.
საუბარი შეეხო საქართველოში გამართული საპარლამენტო არჩევნების შედეგებს და ქვეყანაში მიმდინარე პროცესებს. მიმოხილულ იქნა საქართველოს ახალი მთავრობის საგარეო პოლიტიკის ძირითადი პრიორიტეტები, საქართველოს ევროკავშირთან და ნატო-სთან ურთიერთობები, ინტეგრაციის კუთხით ბოლო პერიოდში მიღწეული წარმატებები და თანამშრომლობის განვითარების სამომავლო პერსპექტივები.
კონსულტაციებზე მხარეებმა განიხილეს საქართველოსა და შვეიცარიის კონფედერაციას შორის არსებული ორმხრივი ურთიერთობების ფართო სპექტრი, ხაზი გაუსვეს სავაჭრო-ეკონომიკური თანამშრომლობის შემდგომი გაღრმავების აუცილებლობას, სახელშეკრულებო-სამართლებრივი ბაზის სრულყოფის მიზანშეწონილობას და საქართველოსა და შვეიცარიის კონფედერაციას შორის რეგიონთაშორისი კავშირების დამყარების მნიშვნელობას. ქართულმა მხარემ გამოხატა მადლიერება შვეიცარიის განვითარებისა და თანამშრომლობის სააგენტოს (SDC) ფარგლებში გაწეული დახმარებისთვის.
შეხვედრაზე ასევე განხილულ იქნა ჟენევის საერთაშორისო მოლაპარაკებებთან დაკავშირებული ძირითადი საკითხები, საქართველოს ოკუპირებულ ტერიტორიებზე არსებული მდგომარეობა, რუსეთ-საქართველოს ურთიერთობები, თანამშრომლობა საერთაშორისო ორგანიზაციების ფარგლებში და რეგიონული და საერთაშორისო მნიშვნელობის საკითხები. ქართულმა მხარემ მადლობა გადაუხადა შვეიცარიულ მხარეს საქართველო-რუსეთს შორის მედიატორობის პროცესში გაწეული ძალისხმევისთვის.
შვეიცარიულმა მხარემ კიდევ ერთხელ დაადასტურა საკუთარი მხარდაჭერა საქართველოს სუვერენიტეტისა და ტერიტორიული მთლიანობისადმი.
