"ნუ გადააქცევენ მთავარ პროკურატურას ცირკად და კბილაშვილი ნუ დაემსგავსება ცირკის დირექტორს", - განაცხადა ჟურნალისტებთან დეპუტატმა დავით საყვარელიძემ მთავარი პროკურორის განცხადების კომეტნტირებისას და აღნიშნა, რომ მისი დაბარება საგამოძიებო ორგანოში პოლიტიკური დევნაა.
"ეს არის პოლიტდევნა და მადლობა ბატონ კბილაშვილს, ეს ფაქტი, დღეს კიდევ ერთხელ რომ დაადასტურა. ჯერჯერობით გარეთ ვარ, როგორც ხედავთ და მაინტერესებს, ბორკილებით გამათრევენ კომიტეტიდან, სესიიდან, თუ სახლში ამომივარდებიან გოგა ხაჩიძის ოჯახივით და ამას ექვს საათზე გააკეთებენ. ამიტომ ნუ გადააქცევენ მთავარ პროკურატურას ცირკად, კბილაშვილი ნუ დაემსგავსება ცირკის დირექტორს და ადეკვატურად იმოქმედონ", _ განაცხადა ჟურნალისტებთან საყვარელიძემ.
შეგახსენებთ, რომ დავით საყვარელიძე ფინანსთა სამინისტროს საგამოძიებო დეპარტამენტში რიყის გასხვისებასთან დაკავშირებით დაკითხვაზე 12:00 საათზე იყო დაბარებული, თუმცა საყვარელიძე დაკითხვაზე არ მივიდა. მთავარი პროკურორი არ გამორიცხავს, რომ თუ მოქმედი დებუტატი საყვარელიძე დაკითხვაზე არ გამოცხადდება, იგი იძულებით მიიყვანონ.