"რუსეთი გვთავაზობს, მასთან არ ვილაპარაკოთ საქართველოს ტერიტორიულ მთლიანობაზე და ჩვენ ამ თამაშში არ უნდა ავყვეთ", - განაცხადა "პრაიმტაიმის" პრესკლუბში სტუმრობისას საპარლამენტო უმცირესობის წარმომადგენელმა გიგი წერეთელმა რუსეთ-საქართველოს ურთიერთობის საკითხის კომენტირებისას.
"ყველა შეხვედრაზე, რომელიც იქნება რუსეთთან, აუცილებლად უნდა დადგეს ეს საკითხები, რადგან აუცილებელია ვიცოდეთ, რა შეხედულებებს წამოჭრიან ისინი აღნიშნულ თემებთან დაკავშირებით. რუსეთი გვთავაზობს, არ ვილაპარაკოთ ამ საკითხებზე და ჩვენ არ უნდა ავყვეთ ამ თამაშში. ამ ლაპარაკს ფორმატი თუ არ მოიცავს, მაშინ ესეც უნდა იყოს გაცხადებული ჩვენი ხელისუფლების მხრიდან", - განაცხადა წერეთელმა.
შეგახსენებთ, რომ აგვისტოს ომის შემდეგ რუსეთ-საქართველოს მხარეებს შორის მოლაპარაკება, სავარაუდოდ, ხვალ შვეიცარიაში შედგება.
