დევნილთა მინისტრი დავით დარახველიძე დევნილ მოსახლეობასთან შეხვედრას ყოველდღიურ რეჟიმში აგრძელებს. დღეს მინისტრი კახეთის გზატკეცილზე, ყოფილი „მექანიკის ინსტიტუტის" შენობში მცხოვრებ დევნილებს შეხვდა.
მინისტრმა დევნილების ძირითადი პრობლემები მოისმინა. დევნილებმა აღნიშნეს, რომ პირველი შემთხვევაა, როცა მათი საჭიროებებით მინისტრი დაინტერესდა და მათთან მივიდა. იძულებით გადაადგულებულებმა მთავარ პრობლემად შენობის გადახურვა, გამრიცხველიანება, კანალიზაციის მოწესრიგება და ფართის დაკანონება დაასახელეს.
"პირველი შემთხვევაა, რომ მინისტრი გვესტუმრა. თავად დაინტერესდა ჩვენი საჭიროებებით და დაათვალიერა როგორ ვცხოვრობთ. 12 წელია ამ პირობებში ვართ და დღემდე მსგავსი არაფერი გვახსოვს. ჩვენი მთავარი პრობლემაა შენობის გადახურვა და ფართის დაკანონება. მინისტრმა ყველას მოგვისმინა და გვითხრა, რომ ეს ორივე საკითხი წლის ბოლომდე მოგვარდება. ასეთი კარგი სიტყვა ჩვენთვის არასდროს არავის უთქვამს. თავს ადამიანებად ვგრძნობთ და იმედი გვაქვს, მინისტრი დაგვეხმარება" - აღნიშნა აფხაზეთიდან დევნილმა ჟანა მიმინოშვილმა.
მინისტრმა დავით დარახველიძემ დევნილებთან შეხვედრისას აღნიშნა, რომ შენობის გადახურვის სამუშაოები რამდენიმე დღეში დაიწყება, დანარჩენი საკითხი კი ეტაპობრივად მოწესრიგდება: „წლების განმავლობაში იძულებით გადაადგილებული პირები საკმაოდ ცუდ პირობებში ცხოვრობენ. არაერთი საკითხი აქვთ მოსაწესრიგებელი - კანალიზაციის , ინდივიდუალური მრიცხველების, გადახურვის, წყალგაყვანილობის. რამდენიმე დღეში შენობის გადახურვით დავიწყებთ და ეტაპობრივად სხვა საკითხების მოგვარებაშიც მივეხმარებით. ჯერ კიდევ საკმაოდ ბევრი ოჯახი ელოდება დახმარებას და შევეცდებით, ყურადღება ყველას მივაქციოთ."
აღნიშნულ შენონობაში აფხაზეთიდან დევნილი 18 ოჯახი ცხოვრობს. მინისტრი ეტაპობროვად სხვა კომპაქტურ ჩასახლებებსაც ესტუმრება და მათ საჭიროებებსაც გაეცნობა.
მასალის გამოყენების პირობები