,,საქართველოში დაბრუნების შემდეგ ირაკლი ოქრუაშვილი აღარ არის პოლიტდევნილი. ის არის პოლიტპატიმარი.M მასზე, როგორც პოლიტპატიმარზე მსჯელობა არ მომხდარა. შესაბამისად მოხდა ის რაც ირაკლი ოქრუაშვილის საქართველოში დაბრუნებამ გამოიწვია", - განაცხადა ჟურნალისტებთან პარლამენტის ადამიანთა უფლებებისა და სამოქალაქო ინტეგრაციის კომიტეტის წევრმა გედევან ფოფხაძემ.
შეგახსენებთ, რომ ირაკლი ალასანია პოლიტდევნილთა სიიდან ამოიღეს. აღნიშნულთან დაკავშირებით ,,ქართულმა პარტიამ" ოქრუაშვილის ადვოკატის ზვიად კორძაძის განცხადებაც გაავრცელა.
,, გვინდა ხაზგასმით აღვნიშნოთ, რომ ირაკლი ოქრუაშვილი არ აპირებდა და არ აპირებს აღნიშნული სიით სარგებლობას იმ მიზნით, რომ ამ გზით მოიხსნას სასჯელი, რომელიც მას შეფარდებული აქვს სასამრთლოს მიერ ან შეიძლება შეეფარდოს მომავალში. ამას ადასტურებს ის ფაქტიც, რომ ის დაბრუნდა საქართველოში, წარსდგა მართლმსაჯულების წინაშე და სამართლებრივი გზით დაიწყო თავისი უდანაშაულობის მტკიცება. ამასთანავე, გვინდა განვაცხადოთ, რომ ჩვენთვის გაურკვეველია ზემოთ აღნიშნული სიის ჩამოყალიბების კრიტერიუმები და ის გარემოება, თუ რატომ ცვლის საქართველოში ჩამოსვლა პირის პოლიტპატიმრის სტატუსს. კერძოდ, თუ ირაკლი ოქრუაშვილი ან სხვა პირები, რომლებიც პოლიტდევნილები არიან, არ ჩამოვიდოდნენ საქართველოში, შეიძლება მოხვედრილიყვნენ ამ სიაში, ხოლო თუ დაბრუნდებოდნენ, სიაში ვერ მოხვდებოდნენ", _ აღნიშნავს კორძაძე.
მისივე თქმით, პოლიტპატიმრის სტატუსს განსაზღვრავს არა პირის ადგილსამყოფელი ან მისი საქმის კვალიფიკაცია, არამედ ის ფაქტი, რომ მის მიმართ სისხლის სამართლებრივი დევნა განხორციელდა და პატიმრობა შეეფარდა პოლიტიკური მოტივით.

ადვოკატი მიიჩნევს, რომ ირაკლი ოქრუაშვილის მიმართ აღნიშნული დადასტურდა ფრანგული მართლმსაჯულების მიერ, როდესაც უარი ეთქვა ქართული მხარის მოთხოვნას მისი გადმოცემის თაობაზე. "ირაკლი ოქრუაშვილი საქართველოში დაბრუნდა, რადგან ჩათვალა, რომ მის საქმეს მოეხსნა პოლიტიკური სარჩული და მხოლოდ სამართლებრივი კუთხით მოუწევდა თავისი სიმართლის დამტკიცება. ბოლოს დღეებში სიასთან დაკავშირებული მოვლენები მას აფიქრებინებს, რომ საქმე კვლავ იძენს პოლიტიკურ ელფერს, რაც ცუდი და სახიფათო პრეცედენტია", _ აცხადებს კორძაძე.