ხვალ, 5 დეკემბერს, პარლამენტში, პლენარულ სხდომაზე, პოლიტდევნილთა და პოლიტპატიმართა შესახებ დადგენილების პროექტს უყრიან კენჭს. "პოლიტიკური ნიშნით დაპატიმრებულ და დევნილ პირთა თაობაზე" დადგენილების პროექტს დეპუტატებს ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია გააცნობს.
კანონმდებლები პოლიტიკური ნიშნით დაპატიმრებული და დევნილის სტატუსის მისანიჭებლად შერჩეული პირების სიას დეტალურად გაეცნობიან.
პროექტით, ადამიანის უფლებათა დაცვისა და სამოქალაქო ინტეგრაციის კომიტეტის მიერ დამტკიცებული სიების შესაბამისად იმ პირთა სია დგინდება, რომლებიც პოლიტიკური ნიშნით დაპატიმრებულ და პოლიტიკური ნიშნით დევნილ პირებად მიიჩნევიან. პროექტის თანახმად, საქართველოს პარლამენტმა უნდა უზრუნველყოს აღნიშნული პირების სისხლის სამართლებრივი პასუხისმგებლობისა და სასჯელისგან გათავისუფლების ან/და სამართლიანი სასამართლოს უფლებით სარგებლობის სამართლებრივი მექანიზმები.
ბესელიას განმარტებით, პოლიტდევნილისა და პოლიტპატიმრის სტატუსის მინიჭება პირის უდანაშაულოდ ცნობას არ ნიშნავს. მისი თქმით, სიის შედგენისას კომიტეტი ევროსაბჭოს საპარლამენტო ასამბლეის 2012 წლის 3 ოქტომბრის დადგენილებით და ევროპის საბჭოს მიერ დადგენილი კრიტერიუმებით ხელმძღვანელობდა. ადამიანის უფლებათა დაცვის კომიტეტმა პოლიტპატიმრად - 190, პოლიტდევნილად კი 25 პირი მიიჩნია.
კომიტეტთან არსებულმა სამუშაო ჯგუფმა 200-ზე მეტი ადამიანის საქმე განიხილა. არიან პირები, რომელთა მიერ წარმოდგენილი დოკუმენტაციის შესწავლა სამუშაო ჯგუფმა ვერ მოასწრო, რის გამოც მას მანდატი კიდევ ერთი თვით გაუხანგრძლივდება.
