რეინტეგრაციის საკითხებში სახელმწიფო მინისტრი, პაატა ზაქარეიშვილი პანკისის ხეობის ადგილობრივ ქისტ მოსახლეობას შეხვდა. მინისტრის ვიზიტი პანკისის ხეობის სოფელ დუისის კულტურის სახლში შედგა. შეხვედრას დაესწრნენ პანკისის ხეობის მოსახლეობა, უხუცესები, პედაგოგები.
ზაქარეიშვილი მიესალმა მოსახლეობას, ისაუბრა პანკისის ხეობის მნიშვნელოვან როლზე ქვეყნის სახელმწიფო პოლიტიკაში და გამოთქვა მზადყოფნა ხეობის ნებისმიერი პრობლემის გადაწყვეტის საქმეში აქტიურ თანამონაწილეობასა და თანამშრომლობისთვის. მინისტრმა ასევე აღნიშნა, რომ ხეობის ქისტი მოსახლეობა ისტორიულად და დღესაც იყო და არის ერთერთი ყველაზე ერთგული ნაწილი საქართველოს სახელმწიფოსი და პირობა მისცა, რომ მათი წვლილი აუცილებლად იქნება დაფასებული ახალი ხელისუფლების მხრიდან.
მოსახლეობამ, თავის მხრივ, გამოხატა თავისი ღრმა პატივისცემა სახელმწიფო მინისტრის მიმართ და მადლობა გამოთქვა ამ მეტად მნიშვნელოვანი შეხვედრისთვის.
მოსახლეობამ განსაკუთრებული აქცენტი განათლების სფეროში არსებულ სირთულეებზე გააკეთა, ასევე მწვავედ დააყენეს მათი მშობლიური, ჩეჩნური ენის ასიმილაციის საშიშროების საფრთხე და მოითხოვეს, რომ სკოლებში შემოღებულ იქნას მათი მშობლიური ენის სწავლება, რაც თავის მხრივ იქნება გარანტი მათ ისტორიულ სამშობლოსთან - ჩეჩნეთთან ურთიერთობების აღდგენისა.
ასევე, პრობლემები აღმოჩნდა ახალგაზრდების დასაქმების, მათი სხვადასხვა პროექტსა და პროგრამაში ჩართულობის ამაღლების მხრივ, რუსეთთან სავიზო რეჟიმის გამარტივების, საზღვრის გადაკვეთისას შექმნილი ხელოვნური შეფერხებების, ინფრასტრუქტურის მოწყობის, ისტორიული მემკვიდრეობის გადარჩენისა და სპორტის სფეროში.
მოსახლეობამ ზაქარეიშვილს მიმართა თხონვით, ობიექტურად მოხდეს ლაფანყურის სპეცოპერაციის გამოძიება.
