პალესტინასთან დაკავშირებით გადაწყვეტილება ზედაპირულად არ მიგვიღია, _განაცხადა ჟურნალისტებთან საქართველოს საგარეო საქმეთა მინისტრის მოადგილემ დავით ჯალაღანიამ პალესტინის საკითხის კომენტირებისას და აღნიშნა, რომ გადაწყვეტილების მიღებისას საქართველოს მხარე ხელმძვანელობდა ეროვნული ინტერესების გათვალისწინებით.
"გადაწყვეტილება ზედაპირულად მიღებული არ იყო. მიმდინარეობდა რეზოლუციაში მონაწილე ყველა მხარესთან ევროპულ ქვეყნებთან, აშშ-თან ინტენსიური კონსულტაციები. გადაწყვეტილება თავისთავად იოლი არ იყო. თუმცა საქართველო გადაწყვეტილების მიღებისას ხელმძღვანელობდა ჩვენი განსაკუთრებული დამოკიდებულებით ამ რეგიონისადმი. ასევე ქვეყნის ეროვნული ინტერესებისა და გამოწვევების გათვალისწინებით", _ განაცხადა ჟურნალისტებთან ჯალაღანიამ და აღნიშნა, რომ ქართულმა მხარემ პალესტინასთან დაკავშირებით მიღებული რეზოლუცია საგარეო საქმეთა სამინისტროს რეკომენდაციის საფუძველზე მიიღო.
მისივე განცხადებით, მიღებული რეზოლუცია ხელს შეუწყობს სტაბილურობას, ახლო აღმოსავლეთში.
"რეზოლუციის საფუძველზე მხარეებს ექნებათ შესაძლებლობა მოლაპარაკების საფუძველზე, დიალოგის გზით მიაღწიონ ძირითად მიზანს _ მშვიდობიან თანაცხოვრებას ახლო აღმოსავლეთში', - განაცხადა დავით ჯალაღანიამ, რომელმაც აღნიშნა, რომ საქართველოსთვის მნიშვნელოვანია მჭიდრო და სტაბილური ურთიერთობა ახლო აღმოსავლეთთან.
შეგახსენებთ, რომ პალესტინას გაერო-ში სტატუსი მუდმივი დამკვირვებლიდან დამკვირვებელ სახელმწიფომდე გაეზარდა, რომელიც გაერო-ს წევრი არ არის. პალესტინის სტატუსის გაზრდას მხარი დაუჭირა 138-მა ქვეყანამ, მათ შორის - საქართველომ. თავი შეიკავა 41-მა სახელმწიფომ, ხოლო ცხრამ ხმა წინააღმდეგ მისცა. სტატუსის მინიჭებას კატეგორიულად ეწინააღმდეგებოდნენ ისრაელი და აშშ.
