სააკაშვილის ტვინში არსებობს ხელისუფლებაში რამდენიმე თვეში დაბრუნების იმედი, - განაცხადა "პრაიმტაიმის" პრესკლუბში ყოფილმა პრემიერ-მინისტრმა ზურაბ ნოღაიდელმა.
მისი განმარტებით, ეს აზრი და ზოგადად, იმედი აბსურდულია, თუმც ეს იმედი მაინც პოლიტიკის განმსაზღვრელია.
ნოღაიდელი ამბობს, რომ სააკაშვილს იმედი აქვს შეინარჩუნებს ბიზნესებს, ტელევიზიებზე გავლენას და შეინარჩუნებს ასევე სასამართლოებს.
"სააკაშვილის ტვინში არსებობს ხელისუფლებაში დაბრუნების იმედი. თუმცა "ნაციონალური მოძრაობის" უკან დაბრუნება გამორიცხულია. მაგრამ სააკაშვილს ჰგონია, რომ შეინარჩუნებს ტელევიზიებს და ბიზნესების დიდი ნაწილს. შეინარჩუნებს სასამართლოებს, თვითმმართველობას და ექნება საშუალება მობრუნდეს ხელისუფლებაში მაგრამ ეს გამორიცხულია. თუმცა კოალიციისთვის ის ხიფათი იქნება და დანოკლეს მახვილივით მისი უკან დაბრუნების საშიშროება არსებობს", - განაცხადა ნოღაიდელმა.
შეგახსენებთ, რომ 2006 წელს ზურაბ ჟვანიას მოულოდნელი დაღუპვის შემდეგ საქართველოს პრეზიდენტმა, მიხეილ სააკაშვილმა ზურაბ ნოღაიდელი საქართველოს პრემიერ-მინისტრად დანიშნა. ამ პოსტზე ნოღაიდელმა 2007 წლის 16 ნოემბრამდე იმუშავა.ამის შემდეგ ის დროებით ჩამოშორდა პოლიტიკას და კახა კალაძის ბიზნესს ჩაუდგა სათავეში. 2008 წლის შემოდგომაზე ნოღაიდელმა პოლიტიკაში დაბრუნება გადაწყვიტა და დაიწყო პარტიის - მოძრაობა სამართლიანი საქართველოსთვის - ჩამოყალიბება. ნოღაიდელის პარტიის მიზანი ვადამდელი საპარლამენტო არჩევნების ჩატარება იყო. 2010 წლის 23 დეკემბერს პარტიის რიგგარეშე ყრილობამ ზურაბ ნოღაიდელი პარტიის თავმჯდომარის პოსტიდან გადააყენა ფინანსური პრობლემის გამო, თუმცა დავალიანების გასტუმრებამდე გამგეობის რიგით წევრად დატოვა. მოგვიანებით ზურაბ ნოღაიდელმა განცხადება გააკეთა ახალი მოძრაობის დაფუძნებასთან დაკავშირებით.