"უკვე ორი თვეა ეს ხელისუფლება მოვიდა და აბსურდებმა სრულიად ახალ სიმაღლეებს მიაღწია. ეს ხელისუფლება სერიოზულად ცდილობს დაარწმუნოს საზოგადოება, რომ მე გუშინ საღმოს ყალბი პასპორტით ვაპირებდი ერევანში გაფრენას პრეზიდენტის დელეგაციასთან ერთად, ევროპის სახალხო პარტიის სამიტზე, რომელიც ერევანში გაიმართა, სადაც ჩვენ გვქონდა შეხვედრები დაგეგმილი ევროკომისიის თავმჯდონმარესთან ბატონ ბაროზოსთან, ევროპის სახალხო პარტიის თავმჯდომარესთან მარტესთან, სომხეთის პრეზიდენტთან, მოლდოვას პრემიერ-მინისტრთან და ევროპარლამენტის სხვა წევრებთან. ამ შეხვედრას ესწრებოდა თითქმის ყველა საეღთაშორისო ტელევიზია და მედიასაშუალების წარმომადგენელი. თქვენც შეგიძლიათ იხილოთ ეს კადრები ჩვენს ეთერებში.
მე მესმის და ყველამ ვიცით, რომ ეს ხელისუფლება აპირებს ყველა დააშინოს და დააკავოს, მაგრამ ის, რაც დღეს განაცხადეს, ეს ყოველგვარ ზღვარს სცილდება. მაღალჩინოსან პოლიციელს ჩაუდეს იარაღი და ნარკოტიკი. შემდეგ იმისთვის რომ დაეკავებინათ ბენზინის ტალონები ჩაუდეს. დღეს გოგა ხაჩიძის ოჯახში ჩაატარეს ჩხრეკა. ნაციონალურ მოძრაობას ბრალდება მსოფლიო პრესის მოსყიდვა და სხვა აბსურუდული გამონათქვამები. ეს, რომ მარტო მე მეხებოდეს, რა თქმა უნდა, ამას იუმორით შევხდებოდი. მაგრამნ ეს ეხება მთელ საზოგადოებას, იმიტომ, რომ ეს ხელისუფლება აპირებს თვალში ნაცარი შეაყაროს ჩვენს საზოგადოებას", - განაცხადა მერაბიშვილმა.
შინაგან საქმეთა სამინისტრომ ყოფილი პრემიერ-მინისტრის, ვანო მერაბიშვილის მიერ ყალბი დოკუმენტის გამოყენებისა და სახელმწიფო საზღვრის უკანონოდ გადაკვეთის მცდელობის ფაქტზე გამოძიება დაიწყო. შესაბამისი განცხადება შინაგან საქმეთა სამინისტროში რამდენიმე წუთის წინ გაკეთდა.

"2012 წლის 30 ნოემბერს ყოფილი პრემიერ-მინისტრი ივანე მერაბიშვილი სახელმწიფო დელეგაციის შემადგენლობაში გამოცხადდა თბილისის საერთაშორისო აეროპორტში. ამავე დელეგაციის შემადგენლობაში ქალაქ ერევანში გამგზავრების მიზნით. საპასპორტო კონტროლის გავლის დროს საქართველოს პრეზიდენტის პროტოკოლის სამსახურის თანამშრომლებმა აეროპორტის მესაზღვრე კონტროლიორს წარუდგინა ივანე მერაბიშვილის პასპორტი. მესაზღვრე კონტროლიორმა კანონით დადგენილი პროცედურის გავლის დროს აღმოაჩინა, რომ სინამდვილეში პასპორტი გაცემული იყო ვინმე ლევან მაისურაძის სახელზე ივანე მერაბიშვილის ფოტოსურათით. აღნიშნულ ფაქტზე თბილისისა და მცხეთა-მთიანეთის საპატრულო პოლიციის მთავარი სამმართველოს საგამოძიებო სამსახურის მიერ დაიწყო გამოძიება ყალბი დოკუმენტის გამოყენებისა და სახელმწიფო საზღვრის უკანონო გადმოკვეთის მცდელობის ფაქტზე", - განაცხადა დღეს გამართულ პრესკონფერენციაზე შინაგან საქმეთა სამინისტროს პრესსამსახურის უფროსმა, ნინო გიორგობიანმა.

მისივე განმარტებით, იმის გამო, რომ არ შეფერხებულიყო სახელმწიფო ვიზიტი და დელეგაციას არ შექმნოდა პრობლემა, ივანე მერაბიშვილს მიეცა საშუალება, წარმოედგინა სხვა, ნამდვილი პასპორტი და მის მიმართ სამართლებრივი პროცედურები მყისიერად არ განხორციელდა.

"იმავე საღამოს, 23.00 საათზე უკან დაბრუნებულმა მერაბიშვილმა პრეზიდენტის ესკორტთან ერთად დატოვა თბილისის საერთაშორისო აეროპორტი, რის გამოც მის მიმართ კანონით დადგენილი საგამოძიებო მოქმედებები ვერ ჩატარდა", - აღნიშნა გიორგობიანმა.

მისივე თქმით, აღნიშნულ საკითხთან დაკავშირებით ვანო მერაბიშვილი დღეს პროკურატურაში დაკითხვაზეა დაბარებული.