ტარიფები მინიმუმ 10%-ით დაიწევს - ამის შესახებ მთავრობის სხდომის დასრულების შემდეგ პრემიერ-მინისტრმა განაცხადა. ბიძინა ივანიშვილის თქმით, "ქართულ ოცნებას" პროგრამაში არ ეწერა, რომ ტარიფები განახევრდებოდა, თუმცა კოალიციის წევრები ამის შესახებ ცალკეულ საუბრებში აცხადებდნენ.
"ვფიქრობ, რომ მინიმუმ 10%-ით მაინც მოვახერხებთ ტარიფების დაწევას, თუმცა განახევრებაზე საუბარი არაა", - აღნიშნა ივანიშვილმა.
პრემიერის განმარტებით, მთავრობის დღევანდელ სხდომაზე მეორე მოსმენით 2013 წლის ბიუჯეტი დაამტკიცეს. ივანიშვილი არ გამორიცხავს, რომ მესამე მოსმენამდე ბიუჯეტში გარკვეული ცვლილებები შევიდეს.
"თუმცა შევთანხმდით, რომ შემდეგი წლის ბიუჯეტი იქნება ხარისხობრივად განსხვავებული. გაცილებით სხვა ტიპის ბიუჯეტი გვექნება და მოსახლეობას ვპირდები, რომ იქნება სულ სხვა ეკონომიკა",-განაცხადა ივანიშვილმა.
პრემიერის განმარტებით, პრეზიდენტისა და ქალაქის "გაურკვეველი ხარჯების" შემცირების საკითხი კვლავ ძალაში რჩება.
