ქვეყნის პრემიერ-მინისტრი და მთავრობა რეგიონული განვითარების სამინისტროს რეორგანიზაციის შესახებ საბოლოო გადაწყვეტილებას დაახლოებით ორ კვირაში მიიღებს. როგორც რეგიონული განვითარებისა და ინფრასტრუქტურის მინისტრი სააგენტო „ჯი-ეიჩ-ენთან" საუბრისას არ გამორიცხავს, რომ სამინისტროს რეორგანიზაციის პროცესი 2013 წლის ბიუჯეტის დამტკიცებამდეც მოესწროს.
„ინფრასტრუქტურის სამინისტროს რეორგანიზაციის საკითხი დღის წესრიგში ისევ აქტუალურად დგას. ჩვენს მიერ მომზადებულია რეორგანიზაციის რამდენიმე ვარიანტი, რომელიც პრემიერ-მინისტრის ადმინისტრაციას წარედგინა. ეკონომიკური განვითარების სამინისტროსთან კოორდინაციით მოხდება სამუშაო შეხვედრის ორგანიზება, სადაც აღნიშნული საკითხი იქნება განხილული"- აცხადებს დავით ნარმანია.
მინისტრის განმარტებით, რეგიონული განვითარებისა და ინფრასტრუქტურის სამინისტროს რეორგანიზაციის შემდეგ, ინფრასტრუქტურის პროექტები ეკონომიკისა და მდგრადი განვითარების სამინისტროში გადავა, ხოლო რეგიონული პროექტები და თვითმართველობის განვითარებასთან დაკავშირებული საკითხები ერთ უწყებაში მოიყრის თავს, რომელიც სამინისტროს ბაზაზე აღმოცენდება.
„ჯერჯერობით ეს საკითხი საბოლოოდ გადაწყვეტილი და დადასტურებული არ არის, თუმცა ფაქტია, რომ ინფრასტრუქტურული კომპონენტების დიდი ნაწილი ეკონომიკური განვითარების სამინისტროში გადავა, ხოლო რეგიონული განვითარებასა და ადგილობრივ თვითმართველობებთან დაკავშირებული საკითხები, ასევე თვითმართველობის რეფორმის კოორდინაცია ცალკე უწყებაში იქნება და ამ უწყებას სტატუსი მთავრობის მიერ გადაწყვეტილი და განსაზღვრული არ არის", - აცხადებს დავით ნარმანია.
