იუსტიციის სამინისტროს ადმინისტრაციულ შენობასთან ადამიანის უფლებათადამცველი ორგანიზაციების წევრებმა აქცია გამართეს. „უფლებათა სკოლის" და „ტოლერანტობის სახლის" ოცამდე წარმომადგენელმა პროტესტი გამოხატა ლანჩხუთის რაიონის სოფელ ნიგვზიანში განვითარებული მოვლენების გამო და სახელმწიფო სტრუქუტურებს - შს სამინისტროსა და პროკურატურას მათზე რეაგირებისაკენ მოუწოდა.
აქციის მონაწილეებს იუსტიციის მინისტრი, თეა წულუკიანი შეხვდა, მან უფლებათადამცველებს ის სტრატეგია განუმარტა, რომელითაც სახელმწიფო რელიგიური კონფლქტების წარმოშობის შემთხვევაში იმოქმედებს.
მინისტრის განცხადებით, მსგავსი კონფლიქტების მოგვარება სახელმწიფოს მხრიდან ძალის დემონსტრირების გზით არასწორია. სახელმწიფო ინსტიტუტებმა უარი უნდა თქვან კონფლიქტში ჩარევაზე და მოახდინოს მათი დარეგულირება. ამ მიზნით, იუსტიციის მინისტრმა, ნიგვზიანში ვითარების დაძაბვისთანავე, საქმის კურსში ჩააყენა საქართველოს საპატრიარქო და საქართველოს მუსლიმთა სამმართველოს მუფტი, რის შემდეგაც დაიწყო მოლაპარაკებები ორი კონფენსიის წარმომადგენელთა შორის. თეა წულუკიანის განცხადებით, ამ წუთებში ქუთასში მიმდინარეობს შეხვედრა მართლმადიდებელი და მუსლიმანური თემების უმაღლეს სასულიერო პირებს შორის, მასში ჩართულნი არიან სახალხო დამცველის აპარატის წარმომადგენლები, უფლებათადამცველები. შეხვედრაში მონაწილეობენ შემოქმედელი მიტროპოლიტი მეუფე იოსები და ადამიანის უფლებათა საპარლამენტო კომიტეტის თავმჯდომარე ეკა ბესელია. როგორც იუსტიციის მინისტრისთვისაა ცნობილი, მათ შორის შეთანხმება მიღწეულია და ამის შესახებ განცხადება მოგვიანებით გაკეთდება. ნიგვზიანის მუსულმანურ მოსახლეობას კი მიეცემა საკუთარი რელიგიური უფლებების დაუბრკოლებლად განხორციელების საშუალება.
რაც შეეხება საკითხის სამართლებრივ მხარეს, თეა წულუკიანის განცხადებით, კონფლიქტის განმუხტვისთანავე, შესაბამისი სტრუქტურები, საქართველოს პროკურატურა და შს სამინისტრო, შეისწავლიან ინციდენტს და, თუკი, კონკრეტული ადამიანების მხრიდან, გამოიკვეთება სისხლის სამართლის დანაშაულის ნიშნების შემცველი კონკრეტული ქმედებები, ყველა მათგანი პასუხს აგებს კანონის წინაშე.
„აუცილებელია ერთმანეთისაგან განვასხვავოთ ორი რამ - კონფლიქტის მოგვარება და შესაძლო კანონდარღვებზე რეაგირება, ჩვენი მიდგომით, პირველ პროცესში სახელმწიფო ასრულებს ფასილიტატორის როლს რელიგიურ ჯგუფებს შორის, და მხოლოდ კონფლიქტის ამოწურვის შემდეგ, შესაბამისი ორგანოები რეაგირებენ შესაძლო სამართალდარღვევის ფაქტებზე", - განაცხადა თეა წულუკიანმა.
შეხვედრის ბოლოს, იუსტიციის მინისტრმა ახალგაზრდებს მადლობა გადაუხადა საკითხით დაინტერესებისათვის და გამოთქვა მზადყოფნა, მომავალშიც უპასუხოს შეკითხვებს, რომლების იუსტიციის სამინისტროს საქმიანობასთან დაკავშირებით, საზოგადოების ამა თუ იმ ნაწილში გაჩნდება
