"ქართულ ოცნებას" რუსეთთან ურთიერთობის დასარეგულირებლად კონკრეტული გეგმა აქვს, - განაცხადა საქართველოს საგარეო საქმეთა მინისტრობის კანდიდატმა მაია ფანჯიკიძემ, ევროპასთან ინტეგრაციისა და საგარეო ურთიერთობათა საპარლამენტო კომიტეტების გაერთიანებულ სხდომის კომენტირებისას, რომელიც რამდენიმე წუთის წინ დასრულდა. თუმცა ფანჯკიძეს არც კომიტეტის სხდომაზე და არც შემდეგ არ უსაუბრია, თუ რა ფორმით აპირებს ჩრდილოელ მეზობელთან ურთიერთობის მოგვარებას.
მისი თქმით, პრიორიტეტულ საკითხებად საქართველოს ევროატლანტიკურ სტრუქტურებში ინტეგრაცია და რუსეთთან ურთიერთობის დალაგება რჩება.
შეგახსენებთ, რომ ევროპასთან ინტეგრაციისა და საგარეო ურთიერთობათა საპარლამენტო კომიტეტების გაერთიანებულ სხდომაზე საგარეო საქმეთა მინისტრობის კანდიდატის მოსმენა სიტყვიერ დაპირისპირებაში გადაიზარდა. ხმაური რუსეთის თემამ გამოიწვია.
,,საქართველომ ძალიან ბევრი რამ დაუთმო რუსეთს თუმცა საინტერესოა, რა მივიღეთ ამის სანაცვლოდ. მას აქვს უკვე უვიზო მიმოსვლა, ბიზნესის კეთებისთვის იდეალური პირობები და ფლობს ყველა სტრატეგიულ ობიექტებს", _ განაცხადა ფანჯიკიძემ სიტყვით გამოსვლისას,რაზეც ,,ნაციონალური მოძრაობის" ერთ-ერთმა ლიდერმა გიორგი ბარამიძემ უპასუხა, რომ სანაცვლოდ საქართველომ ბევრი რუსი ტურისტი და ინვესტიცია მიიღო.