საქართველოს პრეზიდენტი "ქართული ოცნების" გადაწყვეტილებას ეწინააღმდეგება და საქართველოში დიდი ჰესების მშენებლობის შეჩერებას დაუშვებლად მიიჩნევს. უკვე წინასწარ ცნობილია, რომ აღნიშნულ საკითხზე "ქართულ ოცნებასა" და "ნაციონალურ მოძრაობას" შორის დიდი აზრთა დაპირისპირება იქნება.
"ძალიან დიდი შეცდომა იქნება ჰიდროელექტროსადგურების, მათ შორის, დიდი ჰესების მშენებლობის შეჩერება"- ამის შესახებ განცხადებას საქართველოს პრეზიდენტი აკეთებს. მიხეილ სააკაშვილს მიაჩნია, რომ დიდი ჰესების მშენებლობის შეჩერება ენერგეტიკულ პრობლემებს და დენის დეფიციტს წარმოქმნის.
"რაც მთავარია, ძალიან ბევრი ადამიანი დაკარგავს სამუშაოს. თუკი ამას მაინც გააკეთებენ - ასეთი იყო წინასაარჩევნო რიტორიკა - ეს დიდი შეცდომა იქნება. მიმაჩნია, რომ ასევე დიდი შეცდომაა გაჩერდეს დიდი ინფრასტრუქტურული პროექტები, მათ შორის, ახალი პორტების მშენებლობა, რადგან ეს შექმნიდა ათი ათასობით ახალ სამუშაო ადგილს. ასევე უნდა გვესმოდეს, რომ საქართველოში გარდა იმისა, რომ ჩვენმა მთავრობამ ახალ ხელისუფლებას ბიუჯეტში ძალიან ბევრი ფული დაუტოვა. ფაქტი ჯიუტია - საქართველოში პენსია გაიზარდა 10-ჯერ, დაზღვეულთა რაოდენობა გაიზარდა 100-ჯერ, აშენდა ახალი სავადმყოფოები... კარგი იქნება თუ ახალი მთავრობა იმუშავებს ყოველივე ამის გაუმჯობესებაზე", - განაცხადა ქვეყნის პირველმა პირმა.
შეგახსენებთ, რომ "ქართული ოცნების" ლიდერები განმარტავენ, რომ საქართველოში ჰესების მშენებლობის პოლიტიკა უნდა გადაიხედოს. მმართველი პარტია და ახალი მთავრობა არ გამორიცხავს, რომ ქვეყანაში დიდი ჰესების მშენებლობა შეჩერდეს კიდეც. "ქართული ოცნება" აქცენს საშუალო და მცირე ჰესებზე აკეთებს.
