ზურაბ ჟვანიას, ზურაბ ვაზაგაშვილის, სანდრო გირგვლიანის საქმეები გადაიხედება, - ამის შესახებ ჟურნალისტებს იუსტიციის მინისტრობის კანდიდატმა თეა წულუკიანმა განუცხადა.
რაც შეეხება კონკრეტულად ჟვანიას საქმეს, წულუკიანის განცხადებით, აქ უამრავი შეკითხვაა და ნულიდან საჭიროებს გამოძიებას.
"ჟვანიას საქმესთან დაკავშირებით უამრავი შეკითხვა არსებობს და ეს არავისთვისაა გასაკვირი. თითქმის ნულიდან საჭიროებს გამოძიებას. რაც შეეხება ვაზაგაშვილის საქმეს, მისი ოჯახი დაზარალებულადაც კი არ იყო ცნობილი. იმის ნაცვლად, რომ გამოძიება ჩატარებულიყო და დამნაშავეები დასჯილიყვნენ, სავარაუდო დამნაშავეები დაწინაურებულნიც კი იყვნენ. ეს უნდა შემოწმდეს, ჩატარდეს გამოძიება, სადაც დაზარალებული იქნება ჩართული იმ სტანდარტებით, რასაც ითვალისწინებს ევროპული კონვენცია. არა მარტო დაისჯებიან დამნაშავეები, არამედ სასჯელი იქნება ადეკვატური. რაც შეეხება გირგვლიანის საქმეს, შეიძლება ითქვას, რომ ევროპული სასამართლოს მიერ 80-90 პროცენტით არის გახსნილი. დანარჩენი ჩრდილები, რაც ამ საქმეს ახლავს, იმ დამნაშავეებს უკავშირდება, ვინც რეალური დამნაშავე არ იყო, მაგრამ ვიღაცის მაგივრად იჯდა ციხეში. ეს არის საზოგადოების შეკითხვა და უნდა გაირკვეს, ეს ასეა თუ არა", - განაცხადა წულუკიანმა.
