ნავთობპროდუქტების იმპორტიორთა კავშირის განცხადებით, 2012 წლის იანვარ-მარტის თვეებში საქართველოში საწვავის იმპორტმა (ბენზინი და დიზელის საწვავი) შეადგინა 162 262 709,6 კგ, რაც 27 ათასი ტონით ანუ 17 პროცენტით აღემატება 2010 წლის ანალოგიური პერიოდის მაჩვენებელს და 4,2 ათასი ტონით ანუ 2,6 პროცენტით ნაკლებია 2011 წლის მაჩვენებელთან შედარებით. აქვე უნდა აღინიშნოს, რომ მიმდინარე წლის I კვარტალში გასული წლის ანალოგიურ პერიოდთან შედარებით ბენზინის იმპორტი შემცირებულია, დიზელის საწვავის კი - გაზრდილი.
"საყურადღებოა ის, რომ დღეისათვის საწვავის ფასები ისტორიულად ყველაზე მაღალ ნიშნულზე დგას. მიმდინარე წლის იანვარ-მარტის თვეებში 1 ლიტრი საწვავის საშუალო ფასი 30 თეთრით მეტია 2010 წლის პირველი 3 თვის საშუალო მაჩვენებელთან შედარებით და 20 თეთრით - 2011 წლის მაჩვენებელთან შედარებით", - ნათქვამია ნავთობპროდუქტების იმპორტიორთა კავშირის განცხადებაში.
მათივე ინფორმაციით, წელიწადის ეს პერიოდი ხასიათდება ნავთობპროდუქტების შედარებით ნაკლები მოხმარებით, რადგან ამ პერიოდს ემთხვევა ზამთარი, უამინდობა, დასვენებები და ა.შ. საინტერესო იქნება შემდგომ გაზაფხული-ზაფხულის პერიოდში განხორციელებული საწვავის იმპორტის სტატისტიკა, რადგან წელიწადის ეს დროები ხასიათდება ნავთობპროდუქტების მაღალი მოხმარებით. ამ პერიოდში აქტიურ ფაზაში შედის სასოფლო-სამეურნეო, ასევე ინფრასტრუქტურული სამუშაოები, სატრანზიტო გადაზიდვები, იწყება შვებულებებისა და ტურისტული სეზონი, როდესაც განსაკუთრებულად აქტიურია ტრანსპორტით მოძრაობა.
ასევე უნდა აღინიშნოს, რომ ბოლო 2 წლის განმავლობაში აქტიურად მიმდინარეობს ბენზინზე მოძრავი ავტომობილების ავტოგაზზე გადაყვანა, რომლის ღირებულება ბენზინთან შედარებით საკმაოდ სტაბილური და მცირეა (1,10 ლარი/კუბამეტრზე). თუმცა აქვე უნდა აღინიშნოს, რომ მიუხედავად ამისა, ბენზინზე მოთხოვნილება კვლავინდებურად მაღალ ნიშნულზეა.
