საქართველოს პარლამენტის თავმჯდომარის დავით ბაქრაძის განცხადებით, ჩეხეთის დელეგაციის ვიზიტი მნიშვნელოვანია არა მხოლოდ პოლიტიკური, არამედ ეკონომიკური კუთხითაც.
ამის შესახებ ბაქრაძემ, ჩეხეთის რესპუბლიკის სენატის თავმჯდომარე მილან შტეხისთან შეხვედრის შემდეგ, ერთობლივ ბრიფინგზე განაცხადა.
მისი თქმით, ჩეხეთის საკანონმდებლო ორგანო იყო ერთ-ერთი პირველთაგანი, რომელმაც 2008 წლის ომის შემდეგ მიიღო ძლიერი რეზოლუცია რუსულ აგრესიასთან დაკავშირებით.
ბაქრაძის განცხადებით, ეს არ არის მხოლოდ პოლიტიკური ვიზიტი.
,,დელეგაციასთან ერთად იმყოფება ბიზნესმენების ჯგუფი და მათთან ერთად იმართება საქართველოს ჩეხეთის ბიზნეს ფორუმი. შარშან ჩვენმა ტვირთბრუნვამ, ვაჭრობამ 100 მილიონ დოლარს გადააჭარბა, ბოლო წლებში, ჩეხეთის ინვესტიციები საქართველოში 350 მილიონ დოლარს აჭარბებს. ეს ფორუმი იმის შესაძლებლობა იქნება, რომ უფრო მეტი ჩეხური ინვესტიცია ვიხილოთ და უფრო მეტი ქართული ექსპორტი განხორციელდეს ჩეხეთში,, - აღნიშნა პარლამენტის თავმჯდომარემ და იმედი გამოთქვა, რომ ქართველი და ჩეხი ბიზნესმენები საერთო ენას გამოძებნიან.
დავით ბაქრაძემ ასევე ხაზი გაუსვა, რომ ჩეხეთი კვლავ რჩება საქართველოს მხარდამჭერად ნატოსა და ევროკავშირში ინტეგრაციის გზაზე.