სოფლის მეურნეობის მინისტრმა ზაზა გოროზიამ დედოფლისწყაროში, ტარიბანას საგაზაფხულო საძოვრებზე ცხვრის წინასაექსპორტო მოსამზადებელი სამუშაოები დაათვალიერა და ისრაელში ქართული ცხვრის მორიგი პარტიის (3707 სული) ექსპორტზე გაგზავნის პროცესსაც დაესწრო.
ისრაელის ბაზრის ათვისება ქართული ცხვრის საექსპორტო პოტენციალის გაზრდისთვის მნიშვნელოვანია. 2011 წლის თებერვლიდან სოფლის მეურნეობის სამინისტრო ისრაელის მხარესთან მოლაპარაკებებს აწარმოებდა, რის შედეგადაც კომპანია "ედენ ინტერნეიშენალ თრეიდინგს" ისრაელში ცოცხალი ცხვრის ექსპორტზე გაყვანის საშუალება მიეცა. გასული წლის შემოდგომაზე ისრაელში საცდელად 2200 სული ქართული ცხვარი გავიდა. მიმდინარე წლის მაისამდე კი - 12 ათასი სულის გაგზავნა იგეგმება. ისრაელში ქართულ ცხვარზე მოთხოვნა გაიზარდა, რაც ბუნებრივ საკვებზე გაზრდილი ცხვრის ხორცის მაღალმა ხარისხმა და განსხვავებულმა გემომ განაპირობა.
ისრაელში ქართული პროდუქციის, კერძოდ კი - ქართული ცხვრის ექსპორტის გაზრდის საკითხი, საქართველოსა და ისრაელის სოფლის მეურნეობის მინისტრებს შორის გამართულ შეხვედრაზეც განიხილეს.
"მეცხოველეობა ქართული სოფლის მეურნეობისთვის პრიორიტეტული დარგია. ამ მხრივ, ჩვენს ქვეყენას დიდი პოტენციალი აქვს. სამინისტრო მზად არის ხელი შეუწყოს ჩვენს ფერმერებს ამ პოტენციალის სათანადო ათვისებასა და გამოყენებაში. სწორედ ამის მაგალითია ჩვენს მიერ ისრაელის სახელმწიფოსთან მიღწეული შეთანხმებაც, რომლის ფარგლებშიც უკვე განხორციელდა ქართული ცხვრის ექსპორტი ამ ქვეყანაში", - განაცხადა ზაზა გოროზიამ.
ქართულ ცხვარზე მოთხოვნა საერთაშორისო ბაზარზეც იზრდება. მიმდინარე წელს 6715 სული ცხვარი ისრაელში, აზერბაიჯანში, ყატარსა და კუვეიტში ექსპორტზე უკვე გაიგზავნა. წლის ბოლომდე სხვადასხვა ქვეყნებში 200 ათასამდე სულის გაყვანა იგეგმება.
2009 წლიდან დღემდე ისრაელში, აზერბაიჯანში, სომხეთში, ირანში, ლიბიაში, იორდანიაში, დუბაიში, ქუვეითში, ყატარში, სირიაში, ეგვიპტეში და არაბეთის გაერთიანებულ საემიროებში ექსპორტზე 574 900 სული ცხვარი გავიდა.
მასალის გამოყენების პირობები
