თბილისისა და ბათუმის საერთაშორისო აეროპორტების ოპერატორი კომპანია „ტავ ჯორჯია" ტურისტულ გამოფენა "ITB Berlin"-ში მიიღებს მონაწილეობას. 7-11 მარტის ჩათვლით, „ტავ ჯორჯია" ყველაზე პრესტიჟულ სავაჭრო-ტურისტულ გამოფენაზე საკუთარ სტენდს წელს მესამედ წარადგენს.
„ITB Berlin ტურიზმის სფეროში ერთ-ერთი უმნიშვნელოვანესი მოვლენაა. გამოფენაზე თბილისის და ბათუმის საერთაშორისო აეროპორტების სტენდი ყოველთვის დიდი პოპულარობით სარგებლობს. წელსაც საკმაოდ მომზადებულები მივდივართ ბერლინში. მიგვაქვს ყველა სახის საინფორმაციო მასალა, რომელიც ნებისმიერ ადამიანს, ამომწურავ ინფორმაციას მიაწვდის თბილისისა და ბათუმის აეროპორტების მიმართულებებისა და სერვისების შესახებ."- განაცხადა „ტავ ჯორჯიას" ადმინისტრაციის მენეჯერმა თეა ზაქარაძემ.
ბერლინში საკუთარი სტენდით იქნება წარმოდგენილი „ტავ აეროპორტების ჰოლდინგი", რომელიც აქტიურად უჭერს მხარს თავისი შვილობილი კომპანიის, „ტავ ჯორჯიას" საგამოფენო დახლის საერთაშორისო დონეზე წარმოჩენას.
5 დღის განმავლობაში „ტავ ჯორჯიას" წარმომადგენლები, პოტენციური მომხმარებლისა და ახალი ავიაკომპანიების მოზიდვის მიზნით, თბილისისა და ბათუმის საერთაშორისო აეროპორტების შესახებ პრეზენტაციებს გამართავენ.
„შარშან, სწორედ ITB ბერლინზე დავიწყეთ მოლაპარაკებები „Air Astana" -სა და „Alitalia"-სთან. დღეს ეს ორი ავიაკომპანია თბილისის საერთაშორისო აეროპორტში უკვე წარმოდგენილია. იმედი მაქვს, რომ 2012-იც არანაკლებ ნაყოფიერი წელი იქნება და საქართველოთი არაერთი ცნობილი ავიაკომპანიის დაინტერესებას შევძლებთ"-განაცხადა თეა ზაქარაძემ.
ITB Berlin მსოფლიოში ერთ ერთი წამყვანი გამოფენაა, სადაც ქვეყნის წარდგენა და მრავალრიცხოვანი აუდიტორიისათვის გაცნობა ხდება. გამოფენაში მონაწილე კომპანიები ერთმანეთს ტურიზმის სფეროში მიმდინარე ახალ ტენდენციებს უზიარებენ და ერთმანეთში სარფიან გარიგებებს დებენ.
2011 წელს გამოფენაზე წარმოდგენილი იყო 188 ქვეყნის 11,163 კომანია, რომლებმაც გამოფენაზე მოგზაურობისა და ტურიზმის სფეროში არსებული ყველაზე საინტერესო და ხელსაყრელი პირობები, გამოფენაზე მისულ 170, 000-ზე მეტ დამთვალიერებელს გააცნეს.