საგადახდო სისტემების რეგულირების, ზედამხედველობით პრინციპებთან და ფინანსურ გირაოსთან დაკავშირებით პარლამენტში ახალი კანონპროექტის ინიცირება მოხდა, რომლის თანახმადაც "ელექტრონული ფულის" ცნება შემოდის.
ახალი კანონპროექტის "საგადახდო სისტემისა და საგადახდო მომსახურების შესახებ" პროექტიის თანახმად, ეროვნული ბანკი უფლებამოსილი იქნება დაარეგისტრიროს და ზედამხედველობა გაუწიოს საგადახდო მომსახურების პროვაიდერებსა და საგადახდო სისტემის ოპერატორებს, განსაზღვროს სისტემურად მნიშვნელოვანი საგადახდო სისტემა და სისტემურად მნიშვნელოვანი საგადახდო მომსახურების პროვაიდერი და დაუწესოს მას დამატებითი მოთხოვნები.
ამასთან, კანონპროექტი ასევე ეროვნული ბანკისათვის საზედამხედველო ფუნქციის გაფართოებას უზრუნველყოფს საგადახდო მომსახურების კუთხით და ამგვარი უფლებამოსილება გავრცელდება როგორც თანამედროვე საგადახდო ინსტრუმენტების (როგორიცაა ელექტრონული ფული) გამოშვებაზე, მხარეთა უფლებებსა და მოვალეობებს, ისევე როგორც საგადახდო ინსტრუმენტებთან დაკავშრებულ ვალდებულებებს, ასევე მომხმარებელთათვის საგადახდო მომსახურების გაწევასთან დაკავშირებულ საკითხებზე.
აღნიშნული ნორმა ასევე გავრცელდება, როგორც ეროვნული ბანკის მიერ ლიცენზირებულ სუბიექტებზე, ასევე სხვა (სამართლებრივი ფორმის) იურიდიულ პირებზე, ეროვნული ბანკის მიერ მათი რეგისტრაციისა და მათთვის მოთხოვნების დაწესების გზით და სხვ.
ასევე კანონპროექტის მიხედვით ეროვნული ბანკი უფლებამოსილი იქნება განსაზღვროს მნიშვნელოვანი საგადახდო მომსახურების პროვაიდერი და დაუწესოს მას დამატებითი მოთხოვნები.
კანონპროექტი განსაზღვრავს საგადახდო მომსახურების სახეებს და ადგენს მათ ჩამონათვალს, ასევე ითვალისწინებს საგადახდო მომსახურების პროვაიდერების რეგისტრაციის საკითხებს, მხარეთა უფლებებსა და მოვალეობებს, ისევე როგორც საგადახდო ინსტრუმენტებთან დაკავშირებულ ვალდებულებებს და სხვა.
კანონპროექტი ითვალისწინებს გადახდის საბოლოობის უზრუნველყოფას ყველა სისტემურად მნიშვნელოვანი საქართველოს საგადახდო და ანგარიშსწორების სისტემებისათვის, რაც კანონპროექტის ავტორთა აზრით, სისტემური რისკის თავიდან აცილებას შეუწყობს ხელს.
კანონპროექტი ასევე ითვალისწინებს ფინანსური გირაოს წარმოშობისა და აღსრულების პროცედურების გამარტივებას და ასევე აუქმებს ყოველგვარ ფორმალობას გირაოს საგნის შესრულების ან აღსრულებისათვის, რომლებიც მოქმედი კანონმდებლობით არის გათვალსწინებული (როგორიცაა რეგისტრაცია და წინასწარი შეტყობინება). ასევე კანონპროექტით გათვალისწინებულ შემთხვევებში ლიკვიდატორს და დროებით ადმინისტრატორს ეკრძალებათ გააუქმონ ან შეწყვიტონ ფინანსური გირაოს ხელშეკრულებები საქართველოს მოქმედი კანონმდებლობის საფუძველზე.
ასევე შესაძლებელი გახდება გაკოტრებისა და ლიკვიდაციის შემდგომ განხორციელდეს ურთიერთგაქვითვის ის ოპერაციები, რომლებიც გაკოტრებამდე ან ლიკვიდაციის პროცესის დაწყებამდე იქნა შეთანხმებული, რაც ასევე მიზნად ისახავს სისტემური რისკის თავიდან აცილებას.
კანონპროექტი ითვალისწინებს საგადახდო სისტემების დაცვას უცხოური მონაწილეების გაკოტრებისაგან. კერძოდ, კანონპროექტის მიხედვით, უცხოური მონაწილის გაკოტრების შემთხვევაში, მხარეთა უფლებებისა და მოვალეობების განსაზღვრა მხოლოდ საქართველოს კანონმდებლობით მოხდება. შესაბამისად, უცხოური მონაწილის გაკოტრების ან ლიკვიდაციის შემთხვევაში უცხოური გაკოტრების კანონმდებლობის არც ერთი დებულება სამართლებრივი კუთხით არ მოახდენს გავლენას ფინანსურ სტაბილურობაზე საქართველოში.
ასევე, ახალი კანონპროექტი ითვალისწინებს საერთაშორისო კერძო სამართლის თანამედროვე წესების დადგენას იმ ფინანსური ინსტრუმენტების გადაცემასა და დაგირავებასთან დაკავშირებით, რომელთა ფლობაც ჩანაწერით ხორციელდება. კერძოდ, კანონპროექტის მიხედვით, ამგვარი ფინანსური ინსტრუმენტების დაგირავება და გადაცემა საქართველოს კანონმდებლობით იმ შემთხვევაში დარეგულირდება, თუ აღნიშნული ფინანსური ინსტრუმენტები საქართველოში მდებარეობს.
