საქართველოს ეროვნული ბანკის პრეზიდენტმა ცვლილებები შეიტანა 2010 წლის 29 იანვრის №7/01 ბრძანებაში "კომერციულ ბანკებში ნაღდ ფულსა და სხვა ფასეულობასთან დაკავშირებული ოპერაციების წარმოების წესის დამტკიცების თაობაზე".
ცვლილების თანახმად, საქართველოს ეროვნული ბანკი უზრუნველყოფს საექსპერტოდ მიღებული ეროვნული ვალუტის ბანკნოტების და მონეტების ვარგისიანობისა და ნამდვილობის დადგენას, ხოლო უცხოურ ვალუტაზე - მხოლოდ ნამდვილობის დადგენას.
ცვლილების მიხედვით, კომერციული ბანკი ვალდებულია ყოველგვარი შეფერხებისა და საზღაურის გარეშე უზრუნველყოს ლარის ბანკნოტების და მონეტების გამოცვლა ან გადაცვლა სხვა ნომინალის ლარის ბანკნოტებზე ან მონეტებზე (გარდა ყალბი ან გადასახდელად უვარგისი ლარის ბანკნოტების და მონეტებისა).
ვრძებაში აღნიშნულია, რომ სალაროში ნაღდი ფულის და სხვა ფასეულობის მიღება-გაცემისას გამოყენებული დოკუმენტები (შემოსავალ-გასავლის საბუთები და სხვა) უნდა იძლეოდეს მომსახურე ბანკის, კოდის, ანგარიშის ნომრების, მიღებული და გაცემული თანხის (ციფრებით და სიტყვებით) ან სხვა ფასეულობის (აღწერილობით), ოპერაციის დანიშნულების და თარიღის დადგენის საშუალებას, ხოლო კლიენტის იდენტიფიცირება უნდა განხორციელდეს ,,უკანონო შემოსავლის ლეგალიზაციის აღკვეთის ხელშწყობის შესახებ" საქართველოს კანონის მოთხოვნების შესაბამისად.
რაც შეეხება ვალუტის ყიდვა-გაყიდვას, ბრძანებაში შეტანილი ცვლილების საფუძველზე ვალუტის ყიდვა-გაყიდვის დოკუმენტი უნდა შეიცავდეს მომსახურე ბანკის დასახელებას, გაყიდული ან შეძენილი ვალუტის დასახელებას, ოდენობას (სიტყვებით და ციფრებით), თარიღს, ხოლო კლიენტის იდენტიფიცირება უნდა განხორციელდეს ,,უკანონო შემოსავლის ლეგალიზაციის აღკვეთის ხელშეწყობის შესახებ" საქართველოს კანონის მოთხოვნების შესაბამისად.
ნაღდი ფულის მიღების, გაცემის, ვალუტის გადაცვლის და სხვა მსგავსი ტიპის დოკუმენტი დგება მინიმუმ ერთ ეგზემპლარად. მოთხოვნის შემთხვევაში კლიენტს გადაეცემა დამოწმებული ეგზემპლარი.".
კლიენტის მიერ ბანკში შემოტანილ ფულში ან ინკასირებულ ნაღდფულიან ჩანთებში საეჭვო ფულის (რომელთა ნამდვილობისა და გადასახდელად ვარგისიანობის დადგენა ვერ ხერხდება ადგილზე) გამოვლენის შემთხვევაში, დგება ცნობა სამ პირად, რომელთაგან ერთი ეგზემპლარი - ეძლევა კლიენტს, მეორე - რჩება სალაროს, მესამე - ფულის ნიშანთან ერთად ეგზავნება ეროვნულ ბანკს შემდგომი რეაგირებისათვის. ეროვნული ბანკი ექსპერტიზის შედეგებს 10 დღის განმავლობაში ატყობინებს კომერციულ ბანკს. ექსპერტიზის შედეგად ნამდვილი და გადასახდელად ვარგისი ფულის ნიშნის გამოვლენისას შესაბამისი თანხა უნაზღაურდება კლიენტს, ყალბი ფულის ნიშანი არ ანაზღაურდება, გადასახდელად უვარგისი ფულის ნიშანი არ ანაზღაურდება და მოთხოვნის შემთხვევაში უბრუნდება შემომტანს.
ცვლილების მიხედვით, იმ შემთხვევაში, თუ ბანკის მიერ ადგილზე ხდება ფულის ნიშნის გადასახდელად უვარგისად ცნობა, ფულის ნიშანი არ ანაზღაურდება:
ა) თუ კლიენტი ითხოვს გადასახდელად უვარგისი ფულის ნიშნის დაბრუნებას, კომერციული ბანკის მიერ დგება ცნობა ორ ეგზემპლარად და ხელმოწერით დასტურდება ორივე მხარის მიერ. ცნობის ერთი პირი ფულის ნიშანთან ერთად გადაეცემა კლიენტს, ხოლო მეორე პირი რჩება კომერციულს ბანკს;
ბ) თუ ვერ ხერხდება მფლობელისათვის ფულის ნიშნის დაბრუნება (ან თუ მფლობელი უარს აცხადებს მის მიღებაზე) კომერციული ბანკის მიერ დგება ცნობა და ფულის ნიშანთან ერთად ეგზავნება ეროვნულ ბანკს.".
