პარლამენტის ბიუროს სხდომაზე პარლამენტის თავმჯდომარე დავით ბაქრაძე საფრანგეთის პრეზიდენტის, ნიკოლა სარკოზის ვიზიტს გამოეხმაურა და თავისუფლების მოედანზე მის გამოსვლასთან დაკავშირებით კომენტარი გააკეთა.
"ნიკოლა სარკოზის ვიზიტს სხვადასხვა გამოხმაურება მოჰყვა. შეიძლება არსებობდეს სხვადასხვა პოლიტიკური ხედვა, პოლიტიკური შეფასებები, მაგრამ ჩვენ ყველანი ამ ქვეყნის მოქალაქეები ვართ და სასურველია განსხვავებულ პოლიტიკურ შეფასებებს არ გადავაყოლოთ ის მნიშვნელოვანი სიგნალი და მხარდაჭერა, რომელიც საქართველომ ამ ვიზიტიდან მიიღო. განსხვავებული შეფასებების ნაწილი ჩემთვის მიუღებელია არა მარტო პოლიტიკური შეხედულებების გამო, არამედ იმის გაბაიბურება და არგაგება, რაც თქვა საფრანგეთის პრეზიდენტმა, ვნებს საქართველოს ინტერესებს. ის, რაც მოვისმინეთ შაბათს, იყო უაღრესად მნიშვნელოვანი, იყო პირდაპირი მხარდაჭერა ევროპელი პოლიტიკოსის მხრიდან, რომ საქართველო არის ევროპული ოჯახის წევრი და ჩვენი ქვეყანა აუცილებლად გახდება ევროკავშირის წევრი. წლების განმავლობაში დიპლომატიური ბრძოლა მიდის, რათა მივიღოთ ევროპული პერსპექტივა და სარკოზის მიმართვა იყო პირდაპირი მხარდაჭერა არა მარტო რომელიმე პოლიტიკური ძალისადმი, არამედ მთელი ქვეყნისთვის", - განაცხადა ბაქრაძემ.
პარლამენტის თავმჯდომარემ სარკოზის მიერ კონფლიქტების მოგვარების და რუსეთთან ურთიერთობების აღდგენის მესიჯებზედაც ისაუბრა.
"ნიკოლა სარკოზის გამოსვლა მივიღოთ, როგორც ქვეყნის მხარდაჭერა და ნუ განვიხილავთ მას ვიწრო პოლიტიკურ ჭრილში. მსგავსი მესიჯები საფრანგეთის პრეზიდენტს არ გაუჟღერებია რეგიონის მეზობელ სახელმწიფოებში და ამიტომ ნუ დავაკნინებთ ასეთ მნიშვნელოვან ვიზიტს", - აღნიშნა ბაქრაძემ.
ბიუროს სხდომაზე მიმდინარე კვირის პლენარული სხდომის დღის წესრიგის საკითხები განიხილეს. 14 ოქტომბერს სვეტიცხოვლობის დღესთან დაკავშირებით პლენარული სხდომები 11 და 13 ოქტომბერს გაიმართება. როგორც სხდომაზე აღინიშნა, 11 ოქტომბერს, დილის პლენარულ სხდომაზე, უკვე განხილული საკითხების კენჭისყრა მოეწყობა, შესვენების დროს კი საკომიტეტო მოსმენები გაიმართება.
ბიუროს წევრებმა საკანონმდებლო ინიციატივები და საორგანიზაციო საკითხებიც განიხილეს.