"დემოკრატიული მოძრაობა" ბიძინა ივანიშვილის პოლიტიკაში წასვლას მიესალმება. ამის შესახებ "ჯი-ეიჩ-ენს" მოძრაობიდან აცნობეს. როგორც "დემოკრატიული მოძრაობის" მიერ გავრცელებულ განცხადებაშია ნათქვამი, მოძრაობა დიდი ინტერესით ელოდა ბატონი ბიძინა ივანიშვილის მიერ პოლიტიკური პარტიის შექმნისა და მისი საპარლამენტო არჩევნებში მონაწილეობის შესახებ განცხადების სრულ ვერსიას.
"ქვეყნის ამ ძნელბედობის ჟამს, ბიძინა ივანიშვილის მიერ მიღებული პრინციპული გადაწყვეტილება - ჩაებას სააკაშვილის რეჟიმისაგან საქართველოს გათავისუფლებისათვის შეურიგებელ და რეალურ ბრძოლაში, ძალიან მნიშვნელოვანია.
„დემოკრატიული მოძრაობა" მიესალმება მის განცხადებას, მით უფრო რომ მასში დაფიქსირებული ქვეყნის მდგომარეობის ადექვატური აღქმა, წარსულის ანალიზი და უახლოეს მომავალში რადიკალური ცვლილებების გარდაუვალი აუცილებლობა, სრულ შესაბამისობაშია ჩვენს მიერ წლების მანძილზე დეკლარირებულ პოზიციასთან", - აღნიშნულია განცხადებაში.
განცხადების თანახმად, ბიძინა ივანიშვილის მიერ წარმოდგენილი პოლიტიკური ხედვა და სწორი მოქალაქეობრივი პოზიცია უდაოდ გარდამტეხ ეფექტს მოახდენს საქართველოს გადარჩენისათვის ბრძოლაში.
შეგახსენებთ, რომ დღეს, ბიძინა ივანიშვილის მიერ პოლიტიკური პარტიის შექმნისა და 2012 წლის საპარლამენტო არჩევნებში მონაწილეობის შესახებ განცხადების სრული ვერსია გავრცელდა.
