საქართველოს საგარეო საქმეთა სამინისტრო პოლონეთის დედაქალაქ ვარშავაში გამართულ "აღმოსავლეთ პარტნიორობის" სამიტის შედეგებს აქვეყნებს.
საგარეო საქმეთა სამინისტროს ინფორმაციით, სამიტზე ერთობლივი დეკლარაცია მიიღეს.
"სამიტის მონაწილეებმა კიდევ ერთხელ აღნიშნეს „აღმოსავლეთ პარტნიორობის" პრინციპებისადმი ერთგულების ვალდებულება. ერთობლივი დეკლარაციით სამიტის მონაწილეებმა აღიარეს „აღმოსავლეთ პარტნიორობის" ზოგიერთი ქვეყნის ევროპული მისწრაფებები და ევროპული არჩევანი. სამიტის მონაწილეები შეთანხმდნენ, რომ „აღმოსავლეთ პარტნიორობის" მიზნების, ასევე, დემოკრატიის, კეთილდღეობის, სტაბილურობისა და გაზრდილი ინტერაქციის ერთიანი სივრცის ჩამოსაყალიბებლად, აუცილებელია „აღმოსავლეთ პარტნიორობის" შემდგომი განვითარება და გაძლიერება", - აღნიშნულია საგარეო უწყების მიერ გავრცელებულ ინფორმაციაში.
საგარეო საქმეთა სამინისტროს მტკიცებით, სამიტმა დადებითად შეაფასა საქართველოში მიმდინარე დემოკრატიული და ეკონომიკური რეფორმები.
"ერთობლივ დეკლარაციაში აღინიშნა საქართველოსთან ღრმა და ყოვლისმომცველი თავისუფალი ვაჭრობის შესახებ შეთანხმებაზე მოლაპარაკებების წლის ბოლომდე დაწყების შესაძლებლობა. სამიტი მიესალმა საქართველოს მიერ სავიზო რეჟიმის გამარტივებისა და რეადმისიის შესახებ შეთანხმებების ეფექტურ იმპლემენტაციას. სამიტის მონაწილეებმა აღნიშნეს ენერგომომარაგების წყაროების დივერსიფიკაციისა და ამ კონტექსტში, სამხრეთ დერეფნის მნიშვნელობა. ერთობლივი დეკლარაცია ასევე, მიესალმა ევროკავშირსა და საქართველოს შორის ერთიანი საავიაციო სივრცის შესახებ შეთანხმებისა და საქართველოსა და ევროკავშირს შორის სოფლის მეურნეობისა და სხვა საკვები პროდუქტების გეოგრაფიული აღნიშვნების ურთიერთდაცვის შესახებ შეთანხმებების ხელმოწერას.
ვარშავის სამიტის ერთობლივ დეკლარაციაში, 2009 წლის პრაღის სამიტის ერთობლივი დეკლარაციის მსგავსად აღნიშნულია, რომ კონფლიქტები ხელს უშლის თანამშრომლობის განვითარებას. შესაბამისად, აუცილებელია კონფლიქტების დროული მოგვარება საერთაშორისო სამართლის პრინციპებისა და ნორმების სრული დაცვით. სამიტის მონაწილეები მიესალმებიან ევროკავშირის გაძლიერებულ როლს კონფლიქტების მოგვარების საქმეში, მათ შორის, ხაზგასმით აღინიშნა ადგილზე ევროკავშირის მონიტორინგის მისიის მნიშვნელობა", - ნათქვამია ინფორმაციაში.
შეგახსენებთ, რომ 29-30 სექტემბერს, პოლონეთის დედაქალაქ ვარშავაში, გაიმართა "აღმოსავლეთ პარტნიორობის'' მეორე სამიტი, რომელშიც მონაწილეობა მიიღეს ევროკავშირისა და "აღმოსავლეთ პარტნიორობის'' ქვეყნების პრეზიდენტებმა და მთავრობის მეთაურებმა. საქართველოს დელეგაციას ხელმძღვანელობდა საქართველოს პრეზიდენტი მიხეილ სააკაშვილი. სამიტზე გაიმართა ორი პლენარული სესია, სადაც სიტყვით საქართველოს პრეზიდენტიც გამოვიდა.