თელავის მაჟორიტარი დეპუტატობის კანდიდატებმა საკუთარი არჩევანი უკვე გააკეთეს.
"ჩემი მიზანი არის მოხდეს წყლის სისტემების გაუმჯობესება, სოციალურად დაუცველი ფენისთვის უკეთესი პირობების შექმნა, სოფლის მეურნეობის, ტურიზმის, მევენახეობის განვითარება, ასევე ისტორიული ქალაქის ისე მოწყობა, როგორც დღეს ვითარდება თბილისი და ბათუმი", - განაცხადა მაჟორიტარი დეპუტატობის კანდიდატმა ნაციონალური მოძრაობიდან ვასილ დავითაშვილმა.
"ქრისტიან-დემოკრატ" კანდიდატ, ნიკოლოზ ლაშხის თქმით, მისი მიზანია ფეზე დააყენოს თელავი.
"დღეს მე მოვედი არჩევნებზე საკუთარ ოჯახთან ერთად. ხმა მივეცი პიროვნებას, რომელმაც ძალიან კარგად იცის თელავი. იცის თუ რა ჭირდება დღეს თელავს და საქმეს რეალურად მიხედავს. დროა ფეხზე დავაყენო ჩემი თელავი", - განაცხადა ლაშხმა.
"მე მჯერა ჩემი მოსახლეობის. თელაველების, რომლებიც გამოირჩეოდნენ პატიოსნებით, სამართლიანობით და მჯერა რომ გააკეთებენ სამართლიან არჩევანს", - განაცხადა მრეწველების მაჟორიტარი დეპუტატობის კანდიდატმა ვასილ არაბულმა.
დღეს, 2 ოქტომბერს, თელავში შუალედური საპარლამენტო არჩევნები მიმდინარეობს. ცესკო-ს ინფორმაციით, თელავის საარჩევნო ოლქში 56 932 ამომრჩეველია და 54 საარჩევნო უბანი იმუშავებს. საარჩევნო უბნები დილის 7 საათზე გაიხსნა, 8 საათიდან კი კენჭისყრა დაიწყო.
შუალედური საპარლამენტო არჩევნები თელავში მაჟორიტარი დეპუტატის გია არსენიშვილის გარდაცვალების გამო დაინიშნა. არჩევნებში სამი პოლიტიკური პარტია მონაწილეობს: „ერთიანი ნაციონალური მოძრაობა", „მრეწველობა გადაარჩენს საქართველოს" და „ქრისტიან-დემოკრატიული მოძრაობა".
ნაციონალური მოძრაობიდან კენჭს თელავის მუნიციპალიტეტის ყოფილი გამგებელი ვასილ დავითაშვილი იყრის; ქრისტიან-დემოკრატებიდან -პარტიის რაიონული ორგანიზაციის თავმჯდომარე ნიკოლოზ ლაშხი, ხოლო „მრეწველებიდან" თელავის მუნიციპალიტეტის საკრებულოს წევრი ვასილ არაბული.