ცენტრალური საარჩევნო კომისიის ინფორმაციით, საქართველოს პარლამენტის 2011 წლის 2 ოქტომბრის შუალედური არჩევნებისთვის ცესკოში 6 ადგილობრივი და 6 საერთაშორისო დამკვირვებელი ორგანიზაცია დარეგისტრირდა.
ადგილობრივი ორგანიზაციებიდან არჩევნებს დააკვირდებიან: „სამართლიანი არჩევნებისა და დემოკრატიის საერთაშორისო საზოგადოება"; საქართველოს ახალგაზრდა იურისტთა ასოციაცია; „საერთაშორისო გამჭვირვალობა - საქართველო"; „სახელმწიფოს ტერიტორიულ - ადმინისტრაციული მოწყობის სტრატეგიული კვლევითი ცენტრი"; „საარჩევნო გარემოს განვითარების ცენტრი"; „ახალი თაობა - ახალი ინიციატივა".
საერთაშორისო ორგანიზაციებიდან მონიტორინგს განახორციელებენ: „საარჩევნო სისტემების საერთაშორისო ფონდი (IFES)"; საერთაშორისო საქმეთა ეროვნულ - დემოკრატიული ინსტიტუტი (NDI) - საქართველოს ფილიალი; აშშ საერთაშორისო რესპუბლიკური ინსტიტუტი (IRI) / (IRI); ლიტვის რესპუბლიკის ცენტრალური საარჩევნო კომისია; ყაზახეთის რესპუბლიკის ცენტრალური საარჩევნო კომისია; მოლდოვას რესპუბლიკის ცენტრალური საარჩევნო კომისია.
შუალედური საპარლამენტო არჩევნები თელავში მაჟორიტარი დეპუტატის გია არსენიშვილის გარდაცვალების გამო დაინიშნა. არჩევნებში სამი პოლიტიკური პარტია მონაწილეობს - „ერთიანი ნაციონალური მოძრაობა", „მრეწველობა გადაარჩენს საქართველოს" და „ქრისტიან-დემოკრატიული მოძრაობა". ნაციონალური მოძრაობიდან კენჭს თელავის მუნიციპალიტეტის ყოფილი გამგებელი ვასილ დავითაშვილი იყრის; ქრისტიან-დემოკრატებიდან -პარტიის რაიონული ორგანიზაციის თავმჯდომარე ნიკოლოზ ლაშხი, ხოლო „მრეწველებიდან" თელავის მუნიციპალიტეტის საკრებულოს წევრი ვასილ არაბული.
